مداكرة:قضية عمر رداد

Untitled

سلام، خاي @Reda benkhadra: كايبان ليا باللي تخالفنا بزاف على لكتابة دهاد لارتيكل، شوف فالداريجة وعلى حساب النصوصا لقدام ماكانوش الناس كايخدمو لهمزة حيت هاد لقضية كاينة فلعربية صافي، فلحالة دلهمزة كاتبدل سوا بلياء : "الرايس"، ولا بالليف "لاصيلي" وماشي "لأصلي"، "لجزوي" وماشي "لجزئي"، "قضاوي" وماشي "قضائي" حيت هنا راك دخلتي فلعربية لفصحى وزايدون مجاتش معا اللسان ديالنا وحنا خاصنا نحافضو على هاد الطبيعة دجدودنا مانبدلوهاش .جارديني كلمة فرانساوية بزاف واخا كاتخدم ولايني خاصنا ندرجوها كاتدرّج غاتولي "جرايدي"(وحتا اللي قرا ماغيعيقش بلفرق غير ماتعنيش كلمة خرا) بحال "جغرافي" غاتولي "جغرايفي" ، "مؤرخ" غاتولي "ترايخي". الناس لقدام فالداريجة مكانوش كايقولو : "اللي عندو"باش يخففو كانو كايخدمو "بو" بحال "بونعالة"، "بوفاس"، "بوحمارة" "بوقرون" يعني "بو سطاش لعام" ولمڭابل ديالها فلفصحى هيا "ذو". بالنسبة للطريقة اللي كانقولو بزاف هيا لمانيرة ونيت بلفرانساوية كاتعني "Manière" أما طريقة راه كاتعني فالداريجة طريق مضيقة، وشوف نتا OussamaOuh(نقاش)

أهلا سي @OussamaOuh: ف لغالبية د لحالات داكشي لي صلحت درتو باش ينطابق معا داكشي لي تافقنا عليه ف كناش لقواعد. أما داكشي لاخور كانحاول يكون لمعنا باين ؤ واضح، حيت يلا بقيتي كاتحاول تختارع/تركب كلمات جديدة ولا ماواضحاش لكلشي، راه ماكاين لاش نبقاو نكتبو مقالات غير هاكاك بلا مايفهموهوم ناس.

من جيهة أخرا، هاد "نصوصا لقدام" لي عندك ؤ هضرتي عليهم عافاك پارطاجيهم معانا، حيت علا حساب مافخباري داريجة ماكانتش كاتكتب شحال هادي. تهلا --Reda benkhadra (نقاش) 17:44، 24 يونيو 2021 (+01)

أهلا سي @Reda benkhadra:, فلمنضور ديالي كايبان ليا الا بقينا كانجيبو النصاصة ديال لكلمات تاع لمقالة بلعربية لفصحى بلا مانحتارموش النطقان و التركاب دلكلمات فالداريجة راه ماغاتبقاش حتا فايدة للداريجة ديالنا حيت ديجا ڭاع لمغاربة عارفين العربية لفصحى وكايفهموها هادشي فعلا الا بغينا تكون عندنا لوغة كاتميزنا على الشعوبا لخرين شوف نيت دابا راه بانت ويكي بالجزائرية ساهلة غايبقاو يديرو لينا غير كوپي كولي .

لمراد ديالي اللول هوا نحافضو على لميازي تاع الداريجة ديالنا ولكلمة اللي جبناها من لوغة خرا سوا تكون عربية ولا مازيغية خاصنا ندرجوها هادشي اللي دارو جدودنا من شحال هادي(غير دكالة متلا جابو كلمة من لمازيغية "دو أكال" و فاش درجوها ولات "دكال".

بغينا اللي كايقرا لمقالة يحس باللي بصاح كايقرى نص بالدارجة واخا فلول غاتبان ليه فشكل ولايني فاش غايتمعن فيها لواحد غايفهمها دغيا، أما حسن واش "بو" 16 لعام ولا "اللي عندو" 16 لعام ؟ ومنها نيت كانتفاداو لمعاودة بزاف ديال "اللي"،

كايبان ليا هادشي اللي قلت ماكايخافش كناش لقواعد.

ولايني ئيلا كان هادشي مكايوافقش لمقصود ديال ويكي بالدارجة ماعندي مانقول صافي،

يه كاين نص مكتوب بالداريجة لقديمة ، سير للپاج ديال عبد الرحمان لمجدوب و سير لعيون لكلام أتلقا تماك نص فالدرايف.

OussamaOuh(نقاش)

سلام خاي @OussamaOuh:. متافق معاك بلي ماخاصناش نجيبو كلمات من لعربية ؤلا أي لوغة غير هكاك، ؤ هادي أصلا قضية كتضيرونجيني عند شي ناس فاش كيبداو يدخلو كلمات د لعربية ؤلا لفرانساوية غير باش يبانو "قاريين" ؤلا "راقيين". مي ف نفس لوقت راه كاينين ديجا تعابير د لعربية دخلو ل لستيعمال ليومي د لمغاربة ب سباب تّعليم ؤ لإعلام، ؤ يلا جيتي ترومپلاصيهوم ب كلمات مختارعة كاين لّي غادي يعتابر بلي عندنا تحامل ضد لعربية (شّي لّي ديجا كيعتاقدوه شي وحدين غير حيت كنكتبو ب دّاريجة، فا بلا مانزيدو نتبتو ليهوم هادشي). من غير هادشي بنادم ب طبيعتو معڭاز. وخا يقدر يدير مجهود بسيط باش يفهم دوك لكلمات لمدرجين، باغي هوّا يقرا لارتيكل خفا زربا ؤ يمشي يقضي غاراضو. داكشي علاش يلا بغيتي تدخل هاد لكلمات لمدرجين ف لستيعمال، كنضن حسن تديرها بشكل تدريجي، بحيت يكون أغلبية سّاحقة د تّيكست مفهوم مزيان. ؤ يلا كنتي غادي دّير مصطلح جديد ف مرة، حسن نتناقشو عليه ف ميزان لكلام، باش يكون تّيفاق ديال جّماعة. حيت لّوغة ف لّخر لغاراض ديالها هوّا تّواصل. ؤ ماتقلقش، راه عرفت بغيتي تطور دّاريجة ؤ تعطيها شخصيتها ؤ هادشي لّي بغينا كاملين، ولاكين هادي راها خدمة ديال سنوات ؤ خاص يكون تفاعل تدريجي معا لمجتمع لّي كيقرا ويكيپيديا، باش يقدر يولف يقرا نصوص ب دّاريجة ؤ يدخل دوك لكلمات ؤ لمصطلحات ؤ لمفاهيم بشوية بشوية. ؤ يلا بغيتي تكون عندك حرية كاملة ف لكتبة ب دّاريجة ب شّكل لّي كيبان ليك مزيان، تقدر دّير بحال فاروق لمراكشي ؤ تنشر مقالات ؤ كتوبا علا مواضيع علمية ؤلا تقافية ب دّاريجة ب ؤسلوب إبداعي. --Ideophagous (نقاش) 21:56، 24 يونيو 2021 (+01)

تيمنسيوين خاي @Ideophagous:، هضرتك معقولة، متافق معاك فجوايه كلامك، حيت بصاح التعليم و لميديا وتّرو فينا بزاف و قلة لعيون لمكتوبة بالداريجة خلاتنا نطيحو دابا فهاد لمشكل اللي معقد بزاف ماخاصنا غير شي موليير ولا شكسبير اللي يعتقنا من هاد لوحلة. اللي قدرنا عليه دروكة هوا خاص كل واحد فينا يستافد من لاخور بحال فاش صيفتي ليا هاد السيد فاروق لمراكشي قلبت ليه فشي مقالات ديالو ولقيت واحد لكلمة عجباتني ستافدت منها : لبقشايشيا اللي مڭابلها بلعربية هوا "الباحثين" يعني حنا غاديين وكانطورو فالدارجة "پروجي غادي للقدام" ، والصراحة شحال دلكلمات زدتهوم غير من نهار دخلت لهاد لمينصة(لپلاطة).

أما هادوك اللي كايقول ليك كاتحاملو على لعربية راه هوما مّالين لخطيّة ماشي حنا ، حيت هوما اللي متناقضين معا راصهوم لاحقاش على حسابهوم خاصهوم يدويو بلعربية لفصحى واخا مايقدروش يديروها حيت غايبانو مشكّلين. و خلاص كلها ولخلفية ديالو وصعيب ترضي كلشي.

غاندير ما فجهدي باش نطبق داكشي ، حڭا كاينين قصايد دلملحون فيهوم لوغة داريجية مابيهاش يقدر بنادم يرجع ياخد منهوم كلمات. OussamaOuh(نقاش)

سلام خاي @OussamaOuh:. شكرا علا تّفهوم ديالك. معلوم خاص نستافدو من أساليب ديال لملحون ؤ لمكتوبات لقليلة د دّاريجة لقديمة ؤ جّديدة لّي كاينة، غير ف لحالة د ويكيپيديا خاصنا مانساوش لهدف رّئيسي لّي هوّا شّرح ديال لمواضيع بشكل مبسط باش يفهموهوم أغلبية د لمغاربة بلا مجهود. داكشي علاش ماخاصش نكتّرو من ختيراع د لكلمات ؤ لأساليب، من غير فاش ماكيكونش عندنا حل أخور، ؤ نفس شّي كينطابق علا تّخدام ديال كلمات من لوغات خرين لّي مامتداولينش عند لمغاربة. ؤ ب طبيعة لحال راه ويكيپيديا بوحدها ماغاديش تهز دّاريجة ؤ تمشي بيها بعيد. خاص إبداعات برّا لإطار ديالها ف لمقالات ؤ رّيوايات ؤ شّيعر ؤ غيرهوم. ف جميع لحالات راه يالله ڭلنا بسم الله، 4000 أرتيكل راها والو قدام ويكيپيديات خرين. غير ديال لإسپيرانطو، لّي لوغة صطيناعية ؤ كيهضرو بيها غير 2 د لمليون د بنادم، فيها قريبة 300000 أرتيكل ؤ ب جودة حسن من ديالنا. لّي عند لإسپيرانطو ؤ ماعندناش هوّا جماعة كبيرة عندها هتيمام ب لوغتها ؤ ب تّطوير ديالها. داكشي علاش كيبان ليّا تّركيز ديالنا خاص يكون علا بلي نجبدو لهتيمام ديال بزاف د لمغاربة، ؤ نبينو ليهوم بلي دّاريجة كتصلاح كا لوغة د لكتبة ؤ تّقافة، ؤ بلي حتا هوما يقدرو يساهمو ف تّطوير ديالها. --Ideophagous (نقاش) 08:41، 25 يونيو 2021 (+01)

سلام خاي@Ideophagous: أنا كايبان ليا باش نشجعو الناس يكتبو بالداريجة خاص بصاح نحسسوهوم باللي الداريجة لوغة متميزة على لعربية ولا أي لوغة خرا كيما كانت بلا مانحيدو على لمراد الرايسي ديال ويكيپيديا، هادا هوا ريّي. --OussamaOuh(نقاش)