طيفال
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
طيفال
| ||
| ||
| معلومات أساسية | ||
| نوع د لمؤسسة | منظمة | |
| لبلاد | فرانصا | |
| لموضع | روميلي | |
| لمؤسس | مارك ڭريڭوار | |
| تاريخ د تّأسيس | 1956 | |
| سّيت رّسمي | tefal.com | |
| معلومات إضافية | ||
| تسمّات على | متعدد رباعي فلورو الإيثيلين و آلومينيوم | |
| فروع | ||
طيفال (بالفرانساوية Tefal) هي واحد الشركة فرانساوية متخصصة ف الماعن ؤ الدوزان د الكوزينة خصوصا الماعن اللي ما كايلصّقوش. ولات فرع ديال ݣروپ SEB من 1968 ؤ مسجلة 150 بروڤي ديال الختيراع ف العالم.[1]
التاريخ
بدلالفكرة ؤ البداية
بدلشركة طيفال المحدودة (بالفرانساوية: Tefal S.A.) تصاوبات ف 1956 ف سارصيل Sarcelles ف الڤال دو وازي Val-d'Oise، ف فرانسا من طرف جوج ديال المهندسين: مارك ݣريݣوار Marc Grégoire، مهندس ف l'ONERA (المكتب الوطني ديال المدارسة ؤ البحث الفضاوي)[2] ؤ لويس هارتمان Louis Hartmann، المتخصص ديال الپوليميرات اللي ما كايلصقّوس اللي كايتسمّاو الطيفلون téflon. مارك ݣريݣوار كان خدّام كايغيّز القصبات د الصيد ديالو حتى اختارع القصبة الطيليسكوپية بالسبيب ديال الزاج. ولكن المشكلة كانت هي أن المادة اللي صنع منها السبيب كانت كاتتلصّق فاش كايبغي يفكّها ؤ تما فين جاتو الفكرة يخدّم فيها مادة الطيفلون اللي كانت موجودة عند l'ONERA باش السبيب يتفك ب سهولة. فاش مراتو ݣالت ليه يصاوب ليها كاصويرة ما كاتلصّقش، مارك مشى لأقرب حانوت فين لقا غا مقلة.[3] مور ما قرا واحد المقال علمي على الموضوع، ناض حط واحد الپروصيص اللي كايمكّن من التغراس (التلصاق) ديال الطيفلون على ديسك ديال لامينيو: فاش كاتداوي لامينيو ب لاسيد كلوريك كايتسبب ليه ف تقيبات صغار بزاف فين ممكن الطيفلون يشد ؤ يتفيكسا. البروڤي ديال أول مقلة ما كاتلصقش تحط ف 1954. السمية ديال طيفال Tefal جات من الضميص ديال كلمة طيفلون teflon ؤ ألومينيوم aluminium.[4] أول مقلة من هاد الشكل محطوطة ف متحف دوپون دو نومور Dupont-de-Nemours ف ويلمينݣطون ف ماريكان.
محاولة بيع الپروڤي
بدلموراها، مارك حاول يبيع الاختراع ديالو ل بزاف ديال المنتجين بلا حتى فايدة: المقلة ديال القلي ديك الساعة كانو الناس كايشوفوها كا دهاز ديال الدار كايشريوها فاش يالاه كايكّونو الفاميلة ؤ العش ديالهم ؤ كاتبقى تتوارت ؤ تدوز من جيل لجيل، واخا كايرقّعوها مرة مرة. المنتجين إدن كانو ما مسوقينش لهاد الاختراع. هنا فين مارك ݣريݣوار قرّر يصاوب مقاليه اللي ما كايلصّقوش الراسو: ناض أسس ماركة طيفال Tefal ف 1956 اللي كانت عبارة على SARL ديك الساعة ؤ خدّم أول أجير ديالو اللي هو هيلموت موتل Helmut Mottl.
الشهرة ف ميريكان
بدلهاد الماركة الجديدة دارت راواج عالمي كبير مباشرة مور ما ربح تجون فرانكلين كينيدي ف الاتخابات ف ماريكان. حيت مراتو مباشرة من مور ما طلع كانت مشات تصورات شادة مقلة د طيفال ف يدها ؤ هي خارجة من الحانوت د ماكي Macy ف الربيع ديال 1961. كا نتيجة لهاد الشي، المْقالي د طيفال تشهرو بزاف ف ميريكان ؤ تباعو بالملاين. الشي اللي خلا بعض المرات الشركة تصيفطهم ل تمّا ف الطيارة.[5]
فورنيسّور جديد
بدلخمس سنين موراها، واحد من الفورنيسورات ديال الدياسك د لامينيو سميتو فورج دو كرون Forges de Cran ؤ اللي دابا ولّى سميتو پيشيني رينالو Pechiney Rhenalu، ف أنيسي Annecy عرض على شركة طيفال تشري من عندو وْزين[6] ديال لامينيو التيساع ديالو 3000 ميطرو مربع ؤ اللي قريب لفين هوما كاينين. ف 1961 طيفال تأنسطالات ف روميلي Rumilly.
الشريان من طرف ݣروپ سيب
بدلف 1968، طيفال شراها الڭروپ سيب groupe SEB.
النمو ؤ الابداع
بدلالشركة عولات على الابداع بزاف ؤ بالجهد باش تطوّر راسها.[7] ف 1974، خرّجات طاوا ديال الڭوفري ؤ البريكة ديال البوطة د الڭاز. ف 1980، خرّجات للعالمية واحد القشرة مضادة للتلساق سميتها T-Plus.[7] عاماين موراها لونصات أول مقراج ديال الضو ديالها موجهة للسوق النڭليزية. ف 1985 خرجات أول ميزات ديال بنادم خدام بالضو.[7] ف 1990 خرجات حجرة ديال الطياب خدامة بالضو. ف 1995 طيفال دخلات على المارشي ديال Puericulture (التهلية فالترابي) بواحد التشكيلة سميتها Tefal Baby Home (طيفال ديال الترابي ف الدار).[7] ف 2002 خرجات للمارشي القالب ديال السيليكون الساهل ف الخويان.
التلوت
بدلف غشت 2022، الوكالة المحلية ديال الصحة ARS t ف ؤڤيرن-رون-ألپس دارت تحاليل ديال الما الصالح للشريب ف روميلي Rumilly ؤ لقات باللي بالنيڤو ديال PFOA اللي هو واحد المركب ممنوع فايت ب 1,5 للنيڤو المسموح صحيا.[8]
ف فبراير 2023، الجورنال لوموند Le Monde نشر مقال كايدوي فيه على التلوت ديال شي مواضع ف فرانسا بالPFAS ؤ ركز على الموضع ديال روميلي Rumilly، ؤ نبه على أن المفرشات الماوية ف داك السيكطور ملوتين بيه بزاف.[9][10] شي خدّاما قدام ديال ڭروپ سيب (مول شركة طيفال) تّاهمو الڭروپ بأنه جاب كاميونات ديال الPTFE ؤ دفڭهم بالعاني ف مزبالات كانو تما. الشي اللي الڭروپ نكرو.
شهر من موراها، المقاطعة د الساڤوا العالية ؤ الوكالة المحلية ديال الصحة ARS t ف ؤڤيرن-رون-ألپس نصحو الناس باش ما يبقاوش ياكلو الحوت اللي كايصيدوه فالسيكطور د روميلي Rumilly.[11]
عيون الكلام
بدل- ^ "Tefal". www.societe.com. تطّالع عليه ب تاريخ 2019-07-11.
- ^ Noce، Vincent (16 يناير 1996). "Comment M. Téfal a tissé sa poêle. Bilan à la mort de l'inventeur : le Téflon est partout, mais se décolle toujours..." Libération..
- ^ Norbert Alter (2010). Les logiques de l'innovation. La Découverte. ص. 267.
- ^ Marais، Christian (2005). L'âge du plastique: Découvertes et utilisations (ب لفرانساوية). L'Harmattan. pp. 156–157. ردمك 978-2-7475-8037-3..
- ^ "Quand Jackie Kennedy a mis en lumière la marque Tefal". rtl.fr (ب لفرانساوية). تطّالع عليه ب تاريخ 10 ماي 2018.
- ^ Guichonnet، Paul (2007). "Nouvelle encyclopédie de la Haute-Savoie: Hier et aujourd'hui" (ب لفرانساوية). Montmélian: La Fontaine de Siloé. ص. 252. ردمك 978-2-84206-374-0.
- ^ a b c d Meier، Olivier (2012). Management du changement: Changement culturel et organisationnel (ب لفرانساوية). Dunod. ص. 159-160. ردمك 978-2-10-058148-1.
- ^ "Présence de composés perfluorés (PFAS) dans l'eau potable sur la commune de Rumilly". Ville de Rumilly (ب لفرانساوية). تطّالع عليه ب تاريخ 2023-10-24.
- ^ ""Les preuves arrivent en observant les gens tomber malades": une journaliste du Monde décrypte son enquête sur les polluants éternels PFAS". France 3 Bourgogne-Franche-Comté (ب لفرانساوية). 2023-02-26. تطّالع عليه ب تاريخ 2023-10-24.
- ^ "Rumilly, « capitale mondiale de la poêle » et hot spot de la « pollution éternelle » aux PFAS". Le Monde.fr (ب لفرانساوية). 2023-02-24. تطّالع عليه ب تاريخ 2023-10-24.
- ^ "Pollution de l'eau aux PFAS : il est déconseillé de consommer les poissons pêchés dans le secteur de Rumilly". France 3 Auvergne-Rhône-Alpes (ب لفرانساوية). 2023-04-20. تطّالع عليه ب تاريخ 2023-10-24.