صفحة د لويب
الصفحة ؤلا لپاج د لويب (ب نّݣليزية: webpage) هيّا وتيقة ديال التيكست لفوقاني hypertext محطوطة ف لويب. الصفحة د لويب كايسربيها سيرڤور د لويب ل خدايمي User لي طلبها، و كاتبان عندو عادةً ف واحد لپروڭرام سميتو لبراوزر (ب لعربية: متصفح). السيت ؤلا لموقع د لويب هوّا مجموعة د الصفاحي د لويب لي معرّفة كاملة ب نفس السمية د الضومين. متلاً جميع الصفاحي ديال ويكيپيديا ب الداريجة معرّفين ب السمية د الضومين ary.wikipedia.org.
كلا صفحة د لويب ب لموقابيل كاتكون عندها أدريسة د لويب محددة، لي السمية د الضومين طرف منها.[1]
لعناصر
بدلاللب ديال الصفحة د لويب هوّا فيشي د التيكست مكتوب ب اللونڭاج د لماركاپ د التيكست لفوقاني، ؤلا هاش طي إم إل HTML لي كيوصف لمحتوى ديال الصفحة، و كيقدر يحتاوي على إحالات ل موارد خرة د لويب.
الصفحة د لويب هيّا وتيقة مستريكتيرية لي مكونة أساسا من تيسكت فوقاني hypertext، يعني تيكست ؤلا نص لي لبراوزر كيأوّلو على شكل تصاور، طابلوات، ليانات فوقانية hyperlink، و غيرهوم. هاد الليانات لفوقانية يلا كليكا عليهوم لواحد، كيدّيو عادةً ل صفحة خرة د لويب.[2]
لمحتويات ديال لمولتيميديا Multimedia، بحال التصاور، لڤيديوات، و غيرهوم، يقدرو يتغرسو ف الصفحة د لويب نيشان باش يشكّلو وتيقة مركبة من بزاف د لعناصر.
زيادة على لوتيقة د HTML، تقدر تّستعمل وتيقة د CSS ؤلا لورقة لمتتابعة د الستيل Cascading Style Sheet لي كاتحدد الستيل ديال الصفحة، بحال لأحجام د لعناصر و لموضع ديالها، لفونت ديال التيكست (الستيل باش مكتوبين لحروف)، لألوان، و غيرها من التفاصيل.
على وديت باش الصفحة د لويب يكون عندها سلوك ديناميكي (متلاً شي أنيماصيون كاتحرّك على حساب لكليك ديال لخدايمي)، كيتّستعملو سكريپتات ديال جاڤاسكريپت Javacript ؤلا پروڭرامات د لويب أصيمبلي WebAssembly. الصفحة د لويب لي عندها سلوك ديناميكي كاتسمّى أپليكاصيون د لويب Web Application.
السورفاج
بدل
مقالة متعمقة: سورفاج د لويب
كلا پاج د لويب كاتكون معرّفة ب أدريسة د لويب، لي تقنياً كاتسمّى موحديد موحد د لموضع ديال لمورد Uniform Resource Locator ؤلا بختيصار URL. فاش لخدايمي كيدخّل لادريسة ديال الصفحة ف لبراوزر ف موضع مخصص ليها، هاد اللخر كيصيفط طلب ل السيرڤور، لي كيجاوب ب فيشي HTML كيطيلشارجيه لبراوزر معا لموارد لمتعلقة بيه (يلا كولشي مشا مزيان)، و كيطرجم لكوض د HTML ل عناصر متشافة لي يقدر يفهمها و يتعامل معاها لخدايمي. يلا لخدايمي كليكا على ليان فوقاني، هاد لعملية كيأوّلها لبراوزر بحال تدخال داك الليان ف لكارو لمخصص، و كيعاود يدير طلب جديد باش يشارجي الصفحة لي معرّفة ب ديك لادريسة، لي تقدر تكون ف نفس السيت ؤلا ف سيت أخور. لبراوزر كيكونو فيه عناصر متشافة لي كاتبيّن ل لخدايمي إينا صفحة راه كيشوف.
النشر
بدلمن لمنضور ديال السيرڤور، كاينين جوج نواع ديال الصفاحي د لويب: صفاحي تابتين، و صفاحي ديناميكيين. الصفاحي التابتين كيتسرباو من السيستيم د فيشي د السيرڤور كيما هوما، ف لوقت لي الصفاحي الديناميكيين كيتصاوبو سيرپلاص ملي كيطلبهوم لخدايمي، و عادةً كيجيو لمعلومات لي فيهوم من بازضوني، باش يعمّرو واحد لموضيل ؤلا طومپلييت template، قبل ماتّصيفط الصفحة ل لبراوزر.
خاصنا هنا نميّزو مابين صفحة تابتة لي عندها سلوك ديناميكي (مديور متلاً ب جاڤاسكريپت) و كيكون لكوض ديالها واجد بشكل كامل و مصوڤي ف السيرڤور، و صفحة ديناميكية لي كاتّصاوب ب كوضها د HTML على حساب الطلب.