ويكيپيديا:ڭيد د الستيل

هاد الصفحة راها ڭيد ديال لكتابة د لمقالات ب الداريجة ف ويكيپيديا ب الداريجة. لهدف ديال لڭيد هوّا توحيد الطريقة و الستيل د لكتابة على قدر لإمكان، يلا ماكانش ف جميع لمقالات، علّاقل ف نفس لمقال، باش مايتخربقش لقاري و هوّا كيطّالع على لمقال.

بزاف د لويكيپيديات عندهوم ڭيد ديال لكتابة بحال هادا، ولاكين لي كيزيد يعقّد لمسألة هوّا بلي الداريجة ماعندهاش سيستيم د لكتابة موحد (صيغة معيارية)، و بالتالي كاينين أراء مختالفين و متعارضين على كيفاش هاد اللوغة خاصها تّكتب. هادشي كيشمل لختيار د لحروف، لؤرطوڭراف د لكلمات، لختيار د لكلمات، و تا التعابير.

كيما مكتوب ف "ويكيپيديا:لكتابة د الداريجة"، نقدرو نڭولو بلي كاينين جوج توجهات أساسيين ديال لكتابة و لمعيارة د الداريجة: توجه إتيمولوجي لي كيحاول يحافض على لأصل لعربي د لكلمات و طرقان لكتابة ديالها ؤلا يقرّب الداريجة كتر ل لعربية، ب غض النضر على النطقان د لكلمات؛ و توجه فونيتيكي (صوتي) كيفضّل يكتب الداريجة كيما كاتّنطق، ؤلا قريبة ل كيفاش كاتّنطق. هاد الڭيد ماكيحاولش يفرض أسلوب ؤلا طريقة د لكتابة، ب قدر ماكيحاول يوجّه لكتاتبيا، باش يقدرو يقادّو أسلوب لكتابة ديالهوم بحيت تسهال لفهامة د لمضمون و تكون لإستفادة عند لقاريين.

قواعد عامة

• كتب نفس لمقال ب نفس لأسلوب، و نفس السيستيم د لكتابة. ماتبدّلش لأسلوب ؤلا السيستيم د لكتابة ف نفس لمقال (إتيمولوجي ؤلا فونيتيكي ؤلا توفيقي بيناتهوم). متلاً يلا كتبتي "المغرب" ب هاد لإملاء، كتبها ف لمقال كامل هاكا. يلا كتبتيها "لمغريب"، حافض على نفس الطريقة. يلا كنتي كاتفارق لحروف د لجر على لكلمات لي تابعينهوم، ديرها ف لمقال كامل، ؤ زيد ؤ زيد.
• ماتبدلش لأسلوب ديال شي مقال، من غير يلا كان داك لأسلوب كيهرّس لحكام لي ديجا تّافقات عليها الجماعة.
• ختار كلمات لي مفهومة عند أغلبية د لمغاربا. يلا ماكنتيش متيقّن بلي لكلمة مفهومة سوا ب راسها ؤلا من السياق، حاول تشرحها ف لمقال ف نوطة (ملحوظة) ف لتحت د لمقال، ؤلا بين جوج قواس يلا ماكانش هادشي غادي يهرّس السلاسة د لقراية بزاف.
• ماتستعملش كلمات لي غراب ؤلا شبه مستحيل يستعملهوم شي مغريبي، ف لوقت لي كاينين موقابيلات ديالهوم لي معروفين كتر. متلاً لإستعارة ديال كلمة من لعربية ؤ شي مرات من لفرانساوية مقبولة و جاري بيها لعامال ف لمغريب. ولاكين لإستعارة من لألمانية ؤلا الجاپونية ؤلا الشينوية (من غير ف سياقات محددة) ماكاتطراش بشكل طبيعي ف أغلب لحالات.
• جميع لمقالات كايكونو فيهوم تلاتة د لأقسام أساسية: لهادر ؤلا الراس د الصفحة (فيه طاڭات ديال صنادق لمعلومات، طاڭات د الصيانة، التوضيح...)، لڭسدة ؤلا لمحتوى الرئيسي، و الفوتر ؤلا الرجل د لمقال لي كيكونو فيه التصنيفات، و الطاڭات ديال زريعة، ضبط مخازني، و طاڭات د التصنيف. ماتحطش عافاك التصنيفات ف وسط لمقال، ؤلا صندوق لمعلومات ف اللخر.
• على حساب النوع د لمقال، كاينة واحد لقلدة (بِنْية) لي كاتكون متبّعة ف لمحتوى الرئيسي باش يكون الشكل د لمقالات من داك النوع موحّد، و هادشي كيسهّل لقراية و التصحيح. متلاً لمقالات لبيوڭرافية عادةً كاتبدا ب السمية د الشخص، و تاريخ الزيادة و لوفاة ديالو يلا كانو معروفين. يلا ماكانش ڭيد الستيل متوفّر ديجا لي كيشرح هاد لقلدة، شوف عافاك أمتلة د النوع د لمقالات بحال لي بغيتي تكتب، و حاول تّبعها. تا يلا ماكانتش شي حاجة واضحة، تقدر تسوّل ؤلا ڭاع زعم و كتب، و راه يقدرو لكتاتبيا لقدام يتكلّفو ب التصحيح.

علامات التنقيط

عافاك خدّم علامات التنقيط لي جاري بيهوم لعامال ف لمغريب ف لكتابة و ماتنساش تستعملهوم ف لموضع لمناسب. النص لي مافيهش علامات تنقيط كاتصعاب لقراية ديالو، و يقدر بنادم يدير بناقص و مايكمّلوش.

• لفاصيلة:
  • خدّم لفاصيلة لعربية "،" ماشي اللاتينية "," مابين لكلمات ف نص عادي مكتوب ب حروف عربية.
  • خدّم لفاصيلة اللاتينية "," ف لأعداد لعشرية، متلاً 5,24 (خمسة فاصيلة ربعة و عشرين)، ماشي نقطة "." ؤلا فاصيلة عربية "،".
• النقطة: أي فقرة خاصها تّسالا ب نقطة.

لهمزة

وخا لهمزة ف بزاف د لحالات غبرات ف الداريجة (متلا ذئب => ديب، مؤمن => مومن)، كاينين كلمات لي مستاعرين من لعربية فيهوم لهمزة و متداولين و مستعملين بزاف عند لمغاربا. لهمزة كاتلعب دور كبير ف تمييز بعض كلمات على بعضياتهوم، متلا بان # بأن، و خاصها تّكتب ديما، وخا ماتكونش حالة د لإلتباس واضحة.