ويكيپيديا:مونيكا د التقاشر
لمونيكا د تّقاشر ؤلا لكونط تقشيرة هوّا كونط زايد كيديرو لواحد ف ويكيپيديا، بشكل لي كيخرق سّياسات ديالها، ؤلا كيحاول يضور عليها. هاد لقضية نقدرو نسمّيوها "تقشير" ؤلا "مقاشرة". باش تبقا روح د لمسؤولية ؤ تّقة مابين لكتاتبيا د ويكيپيديا، خاص كلا كتاتبي يكون عندو كونط واحد باش كيكتب ؤ كيبدّل ف صّفاحي.
كاينين أسباب معقولة لاش لواحد يقدر يدير كتر من كونط، ولاكين ماشي مقبول باش يدير لواحد كونط ؤلا كونطات خرين باش يخدع كتاتبيا خرين، يخصّر لمداكرات (متلاً يخلق تّيفاق ؤلا نيزاع وهمي، ؤلا يڤوطي ب كتر من كونط)، يتهرّب من لمنع ؤلا تحديد صّلاحيات، ؤلا يخرق سّياسات لي حطاتها جّماعة ب أي شكل من لأشكال.
لمقاشرة تقدر تاخد شكال ؤ نواع بحال:
- يخرج لواحد من لكونط ديالو ؤ يدير تبديلات ب لأيپي بشكل مقصود، سيرتو يلا كان تّبديل كيخرق سياسات د ويكيپيديا
- يصاوب كونط جديد باش يتهرّب من لمنع ؤلا تحديد صّلاحيات
- يخدّم كونط ديال شي خدايمي أخور
- يحل كونط قديم لي مابقاش مخدّم، ؤ يستعملو بحال يلا شخص أخور
- يقنع صحابو باش يديرو كونطات جداد ديالهوم غير باش يدعم شي جيهة ف شي مداكرة ؤلا ف لمحتوى د شي مقال
لمقاشرة تقدر تأدي ب مولاها ل هاد نّتائج:
- منع د لكونطات د تّقاشر (لي زايدين)
- بلوك دايم ل دوك لكونطات + ل لكونط رّئيسي د لكتاتبي لي دارهوم
- تشهير ب جميع لكونطات ؤ لمساهمات ديالهوم على جميع لمشاريع د ويكيميديا
يلا كان كتاتبي عندو سبب معقول باش يستعمل كتر من كونط، خاص هادشي يكون ب لموافقة ديال جّماعة د لكتاتبيا، سيرتو لإمغارن، ؤ من لأحسن يكون كلا كونط فيهوم مكتوب ف صّفحة د لخدايمي ديالو على لكونطات لخرين ؤ لاش كيصلاحو.
تخدام مقبول بدل
تّخدام ديال كتر من كونط ف ويكيپيديا يقدر يكون مقبول ف بعض لحالات، ؤ كاتبقا لمسؤولية ديال كلا كتاتبي باش يتيقّن بلي ماكيستعملش كونطات زايدين بشكل لي كيخرق سياسات د ويكيپيديا. من غير لحالات لي كيكون فيها خطر أمني على لكتاتبي، خاص ضاروري يدير ف كلا كونط كيستعمل (ماشي مسدود ف مرة ؤلا ناعس)، شنو هوما لكونطات لخرين لي عندو، ؤ لاش كيصلاحو. أمتيلا ديال تخدام مقبول:
- كتاتبي لي داير سميتو ف لكونط رّئيسي، ؤ بغا يبدل ؤلا يكتب ف شي موضوع حساس بزاف لي يقدر يسبب ليه مشاكل عائلية ؤلا قانونية
- كتاتبي قديم، سيرتو يلا كان أمغار، لي بغا يشوف كيفاش ولات ويكيپيديا من لمنضور ديال شي كتاتبي جديد
- كتاتبي لي مرة مرة كيدخل ل ويكيپيديا من ريزوات مامأمنينش مزيان، ؤ خاف لا يتّسرق ليه لموضپاس ديال لكونط رّئيسي. ف هاد لحالة من لأحسن يكونو سّميات د لكونطات بجوج متشابهين. متلاّ: "خدايمي:عبد القادر"، خدايمي:عبد القادر 2".
- كتاتبي كيفضّل يدير كونطات مختالفين ف پروجيات مختالفين د ويكيميديا. ولاكين ف ويكيپيديا ب دّاريجة خاص يكون عندو كونط واحد باش خدّام
- كتاتبي بغا يدير بدية جديدة ب كونط جديد، حيت ف لقديم كان تعرّض ل تحرش ؤلا تنمر، ؤلا دار أغلاط لي مابغاهاش تبقا تابعاه. هادشي ماكيشملش لحالات ديال كونط قديم لي تّمنع ؤلا تحدو صّلاحيات ديالو، حيت ف هاد لحالة غادي تكون محاولة ل تّهرب من لمنع ؤ ضّوران على سّياسات د ويكيپيديا
- كتاتبي تبلوكا ليه لكونط حيت داير سمية مامقبولاش (متلاً فيها كلمات زنقاوية ؤلا عبارات عنصرية ؤلا سبّان)، ؤ ماكاين تا شي سبب أخور د لمنع
- كتاتبي مشا ليه لموضپاس، ؤلا تّشفر ليه لكونط. ف هاد لحالة من لأحسن يعلم شي أمغار باش يبلوكي لكونط لي مشا
- كتاتبي عندو صلاحيات تقنية، بحال تّيست، لبوتات ؤ غيرهوم
- يقدر لكتاتبي يدير كونط خاص لي كيبان من لوصف ديالو بلي مديور على ود شي عطاشة تقنية محددة
- لبوت كيخص يكون عندو كونط خاص بيه، داكشي علاش مولاه كيدير كونط إضافي غير ديال لبوت
- يقدر لكتاتبي تّقني يدير كونطات خرين باش يتيستي شي صلاحية ؤلا صلاحيات تقنية محددة
- كتاتبي لي بغا يدير كونط خاص ف إطار مشروع تعليمي، يلا كان ؤستاد ؤلا تلميد/طالب، باش يكون معزول على لكونط شّخصي ديالو