ويكيپيديا:مشاريع لحركات
لْحْركة هي مشروع جماعي د لكتابة ف لموسوعة، محدّد ف لوقت و عندو أهداف باينين. لهدف لّول د لحرْكة هو نعمّرو شي مجال معرفي كانعتابرو ب أنه باقي خاوي ف لموسوعة ديالنا، ب واحد الشكل جماعي زوين و ممتع لّي كايخلّي الناس د جّماعة لويكيپيدية د الدارجة يعرفو بعضياتهوم و يتعاونو ف ما بيناتهوم و يزيدو يقوّيو رّوح د جّماعة ديالهوم.
لْحركة تاريخيا كان واحد شّكل د لعمليات لعسكرية ف لمغريب، كانو كايديروهوم لملوك و السلاطين و حتّا لقياد ف لجيهات يا باش يجمعو الضرائب ولا يرسّخو السلطة د الدولة ف شي بلايص لّي يمكن يكونو خرجو من السلطة ديالها. هاد لحرْكات كانو كايتموّلو ب تعبئة ديال لفلوس و بنادم ديال لمغريب كامل (ب خاطرو ولا ب السّيف).
ف لحالة ديالنا ف لموسوعة غادي نعكسو لآية: جّماعة هي لّي غادي تعبّأ راسها، و بخاطرها، و تشارجي لمكاحل المعرفية ديالها، ماشي باش تخلع ولا تقمع ولا تهدم... باش تعمّر و تحارب عدو واحد: الفراغ و لخوا و الرّوينة.
لْحْركة دايرة بحال شي واد حامل، كانكركبو فيه لمحتوى ب شكل مشبّك بين بزّاف د لمجالات تا كانلقاو راسنا عمّرنا لموسوعة و كانساو گاع منين بدينا...
حْركتنا هي تبوريدة معرفية لّي كولّشي يمكن يدخل ف السّربة ديالها باش لموسوعة ديالنا تزيد تكبر و تكون ف صورة زوينة.
مرحبا بيكوم و وجّدو مكاحلكوم !!!
كيفاش كانخدْمو لْحرْكات
بدلمبادئ توجيهية
بدل- لْحْركات كايخلّيونا نكتبو ب شكل أفقي و نقيسو و نعمّرو بزّاف د لمجالات و نستغلّوهوم باش نديرو بزّاف ديال لخدمة د تّنضيم: تصنيفات، تصاور، لقوالب، صّنادق، نردّو مقالات مزيانة ولا مخيّرة...
لخدمة د لكتابة ف لحركات كاتبدا من مقالات ولا محتويات سوارت (رئيسيين): كانبداو لخدمة د التطوير ولا لإنشاء ديالهوم، و فاين ما تبان وسط منّهوم شي مقالات ولا حوايج خاصّهوم يدّارو كانحطّوهوم ف لجدول.ميتال: كاتبدا لكتابة ديال قصر آيت بن حدو، كاتبان فيها ورزازات (خاصّها تطّور متلا) و گلادياتور (ماكايناش خاصّها تّنشأ)، فوسط گلادياتور كاتبان راسل كرو (خاصّها تّنشأ)... إلخ و هانتا غادي، أي حاجة بانت، كاتّقيد ف لجدول، يمكن يخدمها لّي زادها ولا شي واحد آخور مشارك ف لحركة.
- لخدمة د لكتابة ف لحركات كاتّدار بشكل أساسي ب ليعتيماد على ويكيداطا. منها كيتقادو طابلوات ديال لمواضيع لي غادي نكتبو عليهوم. يلا كان شي موضوع ماموجود تا ف ويكيداطا، لعطاشة اللولة هيّ الزيادة ديالو تماك. ف لحركات لي محددين ف لوقت، فاش كايتفيكساو لمواضيع لي غادي نخدمو عليهوم، من لأحسن ماتزاد تا شي حاجة خرة. يلا بانو مواضيع جداد لي خاص يتدارو، من لأحسن يبقاو ل حركة خرة ف لموستقبال، بعدما تكون سالات لحركة لحالية.
- لجدول د لمتابعة شّكل ديالو ماشي مقدّس، أي واحد يمكن يقتارح مقالات و خدمات تقنيين يدّارو، ب شرط أنه يكون حاطّ يدو ف لمقالات (باش تبدا غير تزيد قتيراحات بلا ما تساهم ف لكتبة راها ناقصة شي شوية).
- يلا بغيتي تشارك قيّد سميتك ف لّائحة د لمشاركين.
- لْحرْكة كاتكون محدّدة ؤلا مامحدداش ف لوقت، و أي واحد يمكن يعرض على جّماعة ل شي حرْكة ف لبرلمان.
- لّي كايخدم على شي مقالة يحاول على قدر جهدو يبين هاد لقالب كاتبدّل دابا ف لبدية د لمقالة.
- لمعايير د لجودة د لمقالات و لّيستات كاينين هنا.
حركات محدودين ف لوقت
بدلهوما حركات لي كيكونو على فترة محددة، و كيكونو فيهوم عادةً مقالات عندها أهمية موسوعية كبيرة ل لقاري لمغريبي، و كاين عدد كافي د لكتاتبيا لي مستاعدين يعاونو فيهوم. لحركات لمحدودين ف لوقت يقدرو يعاودو يتحلّو يلا بقاو فيهوم بزاف د لمواضيع ماكملوش، ؤلا يلا بانو مواضيع جداد متعلّقين ب نفس الضومين. وخا داكشي من لأحسن تّحل حركة جديدة ف هاد لحالة، لي تقدر تكون ب نفس السمية معا نمرة زايدة (متلاً "حركة معالم لمغريب 2"). هادشي غير على ود التنضيم و التتبع، و باش نديرو تقييم مزيان ل لحركات و لإنجازات ديالهوم بشكل منفاصل و منضم.
حركات كاينين دابا
بدل- الدواور د لمغريب (تال 2026)
حركات لي دازو
بدلحركات مفتوحين
بدلهوما حركات لي ماكيكونش فيهوم وقت محدود، عادةً حيت لمواضيع لي فيهوم ماشي مستعجلين ؤلا ب أهمية كبيرة، ؤلا ماكاينينش كتاتبيا لي عندهوم وقت كافي باش يخدمو على لحركة فيساع و بزّربة.