ويكيپيديا:التكتار من العيون و لقتيباسات
وخا توتيق لمقالات ب الزيادة ديال مصادر موتوقة (عيون لكلام) و قتيباسات من هاد لمصادر، شي حاجة لي ضرورية و مرغوبة، ماخاصش بشكل عام يتدارو ب واحد لمقدار لي كتير بزاف بحيت كاتولي نسبة كبيرة من الصفحة فيها غير ليستة ديال لمصادر ؤلا قتيباسات، ف لوقت لي النص لأساسي صغير بزاف ب لمقارنة، ؤلا يولي عندنا زحام ديال لإحالات ل لمصادر ف السطورا، متلا "لمغريب واحد لبلاد[1][2][3][4][5][6][7][8][9][10][11][12][13][14][15][16][17][18][19][20] جات ف شمال إفريقيا".
كاينين بزاف د لأسباب لاش يقدر لكتاتبي يحط مصادر ب الزايد، منها:
- لكتاتبي كيحاول يتبت بلي شي معلومة صحيحة، سوا بشكل تسبيقي حيت كيتوقّع بلي غادي تكون معارضة من عند كتاتبيا خرين، ؤلا حيت فعلياً طرات مداكرة شديدة على لمعلومة
- لكتاتبي كيحاول يتبت لملحوضية ديال شي موضوع، ب الزيادة د مصادر لي من منضورو كاتزيد تأكد لملحوضية
- لكتاتبي شاف لمعلومة ؤلا لموضوع ف شي مقال ؤلا كتاب ؤلا غيرو، ؤ بغا يزيدهوم كا مصدر، وخا ماكيزيدو تا شي معلومة إضافية ل لمقال
- لكتاتبي طرجم التيكست د لمقال من ويكيپيديا خرة، و خلا لمصادر ب الزايد كيما هوما ف لمقال لأصلي
- لكتاتبي كيحاول يطلّع لقيمة ديال لمقال، متلاً باش يولي مقال مزيان ؤلا مخيّر، ب زيادة ديال مصادر د معلومات ديجا موتّقة.
أي معلومة قابلة ل لمراجعة، كيكونو لعشرات ؤلا لألاف د لمصادر لي كيهضرو عليها، ؤ لي يقدرو يتزادو ف لمقال. لهدف د ويكيپيديا ماشي هوّا باش تزيد جميع لمصادر لي كاينين، مي باش تجمع لمعلومات و توتّقهوم ب مصادر لي عندها موتوقية عالية. زيدون، لمقالات د ويكيپيديا خاص لمقروئية ديالهوم تكون مزيانة، بحيت لقاريين مايلقاوش صعوبة ف لقراية ديالهوم، على قدر لإمكان.
كيفاش نتعاملو معا هاد لحالات
بدل- عافاك ماتزيد مصدر غير يلا كانت عندو قيمة موضافة، يعني كيوتّق معلومة كاينة ف لمقال، لي ماعندهاش توتيق، ؤلا لمصادر لي كيوتّقوها ضعاف ب لمقارنة معا لمصدر لي بغيتي تزيد.
- يلا كنتي معوّل باش تزيد شي مصدر باش توتّق معلومة، عافاك تيقّن بلي لمصادر لي موجودين مافيهومش ديجا ديك لمعلومة، سيرتو يلا كانت درجة لموتوقية ديالهوم عالية. يلا ماكانش عندك أكصي ل لمصدر (متلا كتاب مدكورة غير سميتو و مالقيتيهش ف لأنتيرنيت ؤلا ف شي مكتابة)، سوّل لكتاتبي لي زاد لمصدر باش يحط تصويرة د الصفحة لمعنية. ماتحيّدش لمصدر لقديم تا تكون متيقّن بلي لمعلومة لمعنية مامدكوراش فيه، ؤلا بلي ماشي موتوق ب لمرة ف السياق ديال لموضوع.
- يلا بان ليك ضروري باش يتزادو مصادر كيدعمو لمعلومة حيت تقدر تسبب معارضة و حرب ف لكتابة مابين لكتاتبيا، حاول تلتازم ب هاد جوج قواعد:
- زيد لمصدر فوسط السطورا ف لموضع لمناسب، من لأحسن ديريكت مورا لمعلومة، ماشي تعرّم لمصادر كاملين ف لّخر د لفقرة ؤلا لمقال.
- و من لأحسن مايكونوش كتر من 3 تال 5 د لمصادر علّكتيرة متّابعين ف نفس لموضع (حسن ڭاع يكونو غير واحد ؤلا جوج ف نفس لموضع).
- ب لموقابيل يلا كان عندك مصدر واحد كيوتّق بزاف د لمعلومات، من لأحسن ماتحيل ليه تال لّخر د كلا فقرة معنية، ماشي تعاود لإحالة ليه مور كلا معلومة.
- لإتبات د لملحوضية كيتدار ف الصفحة د لمداكرة لي كيناقشو لكتاتبيا بيناتهوم فيها لملحوضية د لموضوع (ف لعادة الصفحة د لمداكرة ديال لمقال براسو). فا ماشي ضروري تدير جميع لمصادر لي كيتبتو لملحوضية ف لمقال. تقدر تحل مداكرة على لملحوضية، ؤلا تجاوب عليها يلا كانت ديجا موجودة، و تماك تزيد لمصادر لي كيتبتو لملحوضية.
- عافاك ماتحيدش لمصادر ف لمقالات بشكل عشوائي. خود بعين ليعتيبار بلي لكتاتبي لي زاد شي مصدر يقدر يكون تعدّب ف لبحت ساعات عاد لقاه ؤ قراه ؤ تيقّن منو. فاش كايتحيّدو بلا مراجعة ؤلا ستيشارة معا كتاتبيا خرين، بحال يلا كاتضرب داك لمجهود كامل ف زيرو. حيّد لمصدر من لمقال غير يلا كنتي متيقّن 100% بلي مافيهش لمعلومة لمعنية، مامناسبش، ؤلا ماشي موتوق.
- فاش تطرجم مقال من ويكيپيديا خرة، عافاك راجع لمصادر مرة خرة على قدر لإمكان، علّاقل باش تّيقّن بلي لمعلومات لي كيوتّقو كاينين فعلياً، ؤ عاود نضّمهوم بشكل مناسب كيما مدكور ف النقاطي لفوقانيين.
- حاجة مزيانة باش نطلّعو لقيمة د لمقالات د ويكيپيديا، ولاكين هاد لقيمة خاصها تكون حقيقية و جاية من لجودة د لمحتوى، ماشي من الزيادة ف لمحتوى بلا معنى كيما كان نوعو (تيكست، تصاور، ليانات/مصادر، موضيلات...)، ؤلا التشطيب على لخانات ديال الشروط د لجودة، بلا مايكون لمقصود منها تحقّق بشكل فعلي. الشروط ديال لجودة غير طريقة باش نسهّلو التحقق من لقيمة د لمحتوى، ماشي هيّا لهدف ف داتو.