ويكيپيديا:التفخيم و الترقيق ف لحروف

باش نحددو لحروف لي خاص يتكتبو بيها الداريجة، خاصنا نعرفو شنو هوما لفونيمات (لأصوات لمتفردة) ديالها. من بين لحوايج لي كيطرحو تحدي، هوّ التفخيم و الترقيق ديال لحروف، لي ف شي حالات يقدر يكون غير زواق (بحال ف كلمة "الله" لي اللام فيها مفخمة)، ولايني ف حالات خرين يقدرو يبدّلو لمعنى، بحال بز (مرققة) = فرض (بز على شي واحد باش يجي)، و بز (مفخمة) = دراري صغار. نقدرو مانحتاجوش ل شكال مفخمين/مرققين من لحروف كاملين، حيت ف لعادة لحروف لي كيجيو حدا بعضياتهم كيقدرو يتنطقو كاملين مفخمين/مرققين، يعني غير لحروف لي كيبانو ف بزاف د لكلمات لي غادي نحتاجو ليهم.

ماحد التبدال د لفونيم ماكيبدّلش لمعنى ماكيكونش موشكيل و ماكانحتاجوش ل حرف جديد، وخا يكون النطقان ديال شي حرف كيتبدّل. متلا ف لفرانساوية حرف R كاين لي كينطقو ر و كاين لي كينطقو غ، و شي مرات كايتّنطق بحال خ، ولايني كيبقى فونيم واحد لي كيخصو حرف واحد حيت وخا يتّنطق ر، غ ولّا خ، كيبقى لمعنى د لكلمة ديما هوّ هوّ. عكس هادشي خاصنا نميّزو بين ق، ك، ڭ و ج حيت وخا كاينين حالات د شي كلمات لي كيتنطقو ب جوج حروف فيهم بلا مايتبدّل لمعنى (بحال قال = ڭال)، كاينين حالات لي ماكيكونش هاد التطابق (متلا كانڭولو "ڭلس" و ماكانڭولوش "قلس")، يعني ضروري يكونو هاد لحروف ب ربعة متميّزين على بعضياتهم ب رشمات مختالفين.

ف لعربية تدارو حروف السين و الصاد، باش يفرّقو بين الصوت S مفخم و مرقق، حيت كيبدّل لمعنى سيف # صيف، سار # صار، سلب # صلب... إدن تا ف الداريجة، يلا كانو فونيمات مفخمين ولّا مرققين كيبدّلو لمعنى ف عدد د لحالات، نقدرو نديرو جوج حروف جداد باش نميزو لحالات لمرقّقين و لمفخّمين.

كاينين حالات من هاد النوع ب الرا، الزاي، الجيم، لميم، اللام و لبا. لحل يقدر يكون حروف جداد، ولّا رشمة خاصة لي كاترشم ل التفخيم ولّا الترقيق (بحال ف الروسية).

حالات د التفخيم و الترقيق على حساب لحرف

ف هاد الطابلوات مديورين حالات ديال حروف لي يلا تنطقو ب الترقيق ولّا التفخيم، كيتبدّل لمعنى ديال لكلمة. بزاف د هاد لحالات موخودين من كتاب الليساني لمغريبي محمد لمدلاوي "العربية الدارجة".

نويطة 1: لحروف لي حدا حرف مفخّم عادةً تا هوما كايتفخمو، داكشي علاش دوك لحالات ماغاديش يتعاودو ف طابلو خاص ب دوك لحروف. و زيد يلا حرف سابق خور ف الترتيب د لكتابة، لكلمة غادي تّزاد ل الطابلو د لحرف لي سابق.

نويطة 2: لحروف تّختارو على حساب لي فيهم حالات كتار و ماشي ديما مرتابطين ب شي حرف خور لي عندو بزاف د لحالات د الترقيق و التفخيم (باش نشوفو غير لحالات لي يقدر يكون ضروري يتدار فيهم حرف جديد). لحالات لي مكتوبين ب خط غليض هوما لي كيبان فيهم غير داك لحرف، ولّا كيبان معا حروف لي مافيهمش حالات د التفخيم/الترقيق معزولين، حيت هادشي كيبيّن بلي داك التمييز يقدر يكون ضروري ل داك لحرف.

نويطة 3: لحالات د الترقيق و التفخيم لي ديجا عندهم حروف مفرّقين بحال س/ص، د/ض، ت/ط، ماغاديش يتدارو ليهم أمتلة.

ب

ترقيق	معنى	تفخيم	معنى	نويطات
بز	فرض	بز	دراري صغار	تقدر تّحسب معا الزاي لي فيها بزاف د لحالات
برا	أداة د لخياطة	برا	بريّة، رسالة	تقدر تّحسب معا الرا لي فيها بزاف د لحالات
بولا/بولة	حالة ملي كيبول لواحد (جاتو لبولة)	بولا/بولة	لامبة ديال الضو	نقدرو نميّزو بيناتهم ب لكتابة ديال تا مربوطة/ليف ف اللخر
بان	جا ولّا تّوجد ف بلاصة كاتّشاف	بان	منع، بلوكاج ولّا تحياد د لكونط (ضربوه ب لبان)
بالا	1- بالا، كيبالي، دار شي حاجة فيساع 2- دكي	بالا/بالة	أداة ديال التنضيف، باش متلا كانحيّدو لوسخ ولّا التراب	نقدرو نميّزو بيناتهم ب لكتابة ديال تا مربوطة ف لحالة التانية

ج

إقتراح ديال حرف زايد: چ

ترقيق	معنى	تفخيم	معنى	نويطات
جاوج	تاني، لي جا ف الرتبة 2	جاوج	طويّر
جر	(حيوان مجرار بحال لبڭرة) سرط لماكلة، و عاود ردّها باش يمضعها	جر	سحب	تقدر تّحسب معا الرا لي فيها بزاف د لحالات
حجر	موضع ف لڭسدة بين لفخاض	حجر	طرف قاسح د لأرض	تقدر تّحسب معا الرا لي فيها بزاف د لحالات
جرى	مشي بزّربة	جرى	طرا	تقدر تّحسب معا الرا لي فيها بزاف د لحالات
جاري	سايل، مايع	جاري	واحد ساكن حدايا	تقدر تّحسب معا الرا لي فيها بزاف د لحالات

ر

إقتراح ديال حرف زايد: ڔ، ړ، ږ

ترقيق	معنى	تفخيم	معنى	نويطات
رايب	مهدّم، طايح (متلا حيط رايب)	رايب	1- يوݣورت 2- (حليب) خاتر
عشرة	مصاحبة و معرفة مزيانة و طويلة	عشرة	10
كرّم	نشّف، يبّس (متلا لخبز)	كرّم	دار ل شي واحد تكريم
شرّف	ردّو شارف	شرّف	دار ل شي واحد تشريف
ربايب	جمع ربيب	ربايب	جمع رب
عـٰرف	شطارة	عـٰرف	شريط د الشعر ف الراس
عڭر	ماكيولدش	عڭر	قاس ف جرح
كيران	جمع كير	كيران	جمع كار
فيران	جمع فار (حيوان)	فيران	جمع فار (ضو د الطونوبيل)

ز

إقتراح ديال حرف زايد: ژ

ترقيق	معنى	تفخيم	معنى	نويطات
زرّب	سرّع	زرّب	ضوّر زرب (سياج) على شي موضع
زينة	زوينة، جميلة	زينة	مجموعة مكوّنة من 12 حاجة
تزوز	تجوج/تزوج (ف شي لهجات)	تزوز	تزيّن، لبس مزيان

ن

ترقيق	معنى	تفخيم	معنى	نويطات
نمّي	كبّر، زاد ف شي حاجة (متلا نمّي لإقتصاد)	نمّي	الجلدة لي كاتحيّد ف لختانة
منّك	من عندك	منّك	تغيّب