لقضية د ليلهامر
لقضية د ليلهامر، كاتعني بيها لقتيلة لي وقعات فـ21 يوليوز 1973 ف ليلهامر (نورڤيج) د أحمد بوشيخي، سرباي مغريبي-نورڤيجي خو شيكو بوشيخي ديال جيپسي كينݣ، لي دارتها لموصاد ف إطار عملية غضب رب. لموخابارات لإسرائيلية سحابليهم هو علي حسن سلامة، زعيم ديال منضمة أيلول لكحل، لي مسؤولة على لقتيلة ديال لعاب لؤلمپية د ميونيخ. ستة من خمسطاش لعميل د لموصاد شاركو فهاد لعملية شداتهم سلطات د نورڤيج ؤ تحكم عليهم. هاد لقضية طيحات من سمعة ديال لموصاد. سلامة لحقيقي قتلاتو لموخابارات د إسرائيل حتال 1979.
سياق
بدلمن بعد لقتيلة ديال لعاب لؤلمپية د ميونيخ فـ1972 لي مات فيها حضاش لعايبي إسرائيلي، لوزيرة لولا د إسرائيل ݣولدا ماير عطات ضو لخضر باش تدار عملية غضب رب باش يتقتلو ناس لي كانو مور ديك لقتيلة. علي حسن سلامة، زعيم ديال منضمة أيلول لكحل ؤ مسؤول ديال لقوة 17، كان من بين لوحدين لي لموصاد خاصها تصفيهم.
تتبع و لقتيلة
بدلفيوليوز 1973، لموصاد سحابليها لقات لأتر د سلامة مورما تبعات واحد لجازائيري، كمال بنامان، لي حسباتو بلي راه وسيط ديال أيلول لكحل.[1] هاد لخر مشا ل ليلهامر من جونيڤ، ؤ لموخابارات لإسرائيلية سحابليها بلي راه غادي يتلاقا سلامة بتخبية فديك لمدينة نورڤيجية صغيرة. خمسطاش لعميل تصافطو لتما، من بينهم لمدير لعام د لموصاد زڤي زامير ؤ مدير لعملية ميكايل هراري. فـ20 يوليوز 1973، سحابليهم سلامة هو بوشيخي حيت لجازائيري لي تابعينو بدا يهضر معاه.[2] هاد سرباي لمغريبي-نورڤيجي تولد فـ13 أبريل 1943 ؤ هو لخو لكبير د شيكو بوشيخي، لي هو من لمؤسسين د جيپسي كينݣ. كان عايش ف ليلهامر هادي تسع سنين ؤ مزوج بنورڤيجية سميتها طوريل لارسن، لي كانت حاملة ببنتهم.[1] أحمد ماكانتش عندو علاقة ب لمونضامات لفيليسطينية.
لغد ليه فليل، بوشيخي ؤ مراتو لحاملة كانو راجعين من سينيما. واحد طوموبيلة صايݣينها إسرائيليين وقفات حدا دار ديالهم. جوج منهم تيراو على بوشيخي 13 لمرة بسلاح كاليبر 22 قدام مراتو. هربو موراها بزبة من مسرح لجريمة فطوموبيل ديالهم. ملي لبوليس نورڤيجي جا، لقاو بوشيخي مات.[2]
لعواقب
بدلهاد لقتيلة أترات ف سكان د ليلهامر، حيت كانت أول جريمة د دم وقعات ف لمدينة من هادي 36 عام. لإسرائيليين مافهموش لقضية مورما نشرات صحافة نورڤيجية لخبار.[2]
ستة د لإسرائيليين شدهوم لبوليس بتهمة لقتيلة. وحدا من لي خدامين ف لموصاد، سيلڤيا رافايل، ستعلملات پاسپور كانادي بسميت، پاطريسيا روكسبورو، لي كاينة بصح ؤ تسرق ليها پاسپور ديالها ف موريال.
جوج من ناس د لموصاد لي شاركو ف لقتيلة، دان إرت ؤ ماريان ݣلادنيكوف، كانو كراو طوموبيل بسميتهم لحقيقية. تشدو ؤ هوما غاديين يردو طوموبيل ف ماطار ؤصلو. مور ستينطاق، هاد جوج عطاو للبوليس لادريسة ديال واحد دار فين كاينين ربعة ديال لمخبرين إسرائيليين، من بينهم سيلڤيا رافايل، لي كانت وحدا من لعناصر لمهمة د لموصاد، ؤ تحكم عليها بتهمة لقتيلة فهاد لقضية.
سلامة لحقيقي ف لخر قتلاتو لموصاد ف بيروت فـ1979.[1]
فـ1996، لحوكومة د إسرائيل صرفات واحد تعويض لعائيلة بوشيخي، والاكين ماعتارفاتش ب لجريمة.[3] خمسة من لمخبرين دغيا خرجو من لحبس.[2] ؤ سيلڤيا رافايل من بعد شي أعوام ف لحبس تعطاتها حرية مسبقة مورما تدخل لموحامي ديالها أنايوس شوت، لي تزوج بيها من بعد.[4]
عيون لكلام
بدل- ^ a b c Rick Fountain (2005-01-01). "Bungled Israeli killing revealed" [قتيلة إسرائيلية ماصدقاتش تكتشفات]. BBC (ب نڭليزية). مأرشيڤي من لأصل ف 2023-10-15. تطّالع عليه ب تاريخ 2020-07-21.
- ^ a b c d David B. Green (2016-07-21). "When the Mossad's Revenge for the Munich Olympics Went Tragically Wrong" [ملي نتيقام لموصاد على لعاب لؤلمپية د ميونيخ مشا غالط]. Haaretz (ب نڭليزية). مأرشيڤي من لأصل ف 2022-03-24. تطّالع عليه ب تاريخ 2020-07-21.
- ^ "ISRAEL COMPENSATES OSLO WIDOW" [إسرائيل كاتعوض لأرملة د ؤصلو]. The Washington Post (ب نڭليزية). 1996-01-27. مأرشيڤي من لأصل ف 2020-07-23. تطّالع عليه ب تاريخ 2020-07-21.
- ^ Brigitte Thévenot (2013-11-12). "Sylvia, une vie au sein du Mossad" [سيلڤيا، حياة وسط لموصاد]. tribunejuive.info (ب لفرانساوية). مأرشيڤي من لأصل ف 2023-06-07. تطّالع عليه ب تاريخ 2020-07-21.