كورة برا التيران
كورة ملعوبة و برّا التيران هو لقانون التاسع ديال لقواعد د اللعبة ديال الرياضة د كورة، وكاتوصف لحالات بجوج ديال اللعب (لموضع ديال لبالون ف التيران د كورة).
ملعوبة بدل
لكورة كاتبقا ملعوبة من لبدية د الشوط حتال لافّان ديالو، من غير إلا:
- لكورة خرجات من التيران إلا فاتت خط لݣول أولّا خط التوش بلا ماتقيس الضس (هادشي فيه إلا تماركا بيت)؛ أولّا
- لحكم وقّف اللعب (فاش متلا لقواعد كايتخرقو، شي كوايري واكل الدق واللي خاص الطبيب يشوفو، أولّا الشوط سالا).
- لكورة قاست لحكم، بقات فالداخل دالتيران، وواحد من هاد لحوايج طراو:
- فرقة بدات لأطاك
- كورة مشات نيشان لشي ݣول
- لفرقة اللي كانت شادة كورة تبدلات[1]
لمعيار اللول كايݣول باللي "لكورة كاملة خاصها تفوت لخط كاملو"، وكايتعتابر معيار موهيم فلقرارات اللي كاتعلّق بلبيوتة. لقانون كايݣول باللي لكورة كاتبقى ملعوبة واخّا تقيس شي راية د الركنية، أولّا لعارضة أولّا الرجلين دياول لݣول، وترجع، أولّا أحي حالة فاش كاتقيس لحكم من غير لحالات اللي كاينين لفوق.
فاش كاتكون لكورة ملعوبة لكوايرية يقدّو يقصّرو بيها، يحيّدوها من لكوايرية ديال لفرقة لخرة أولّا يماركيو بيوتة. إلا اللعّابة دارو لغلاط فراه كايتعاقبو. الشونجمو ماخصّوش يكون فاش كاتكون كورة ملعوبة. لحكم يقدر يخلّي اللعب عوض مايوقّفو إلا كان هادشي غاينفع لفرقة اللي تّرتاكب ضدها لغلط. هادشي كايتسمى "لأولوية فلقصارة".[2] لحكم كايوقّف اللعب وكايعطي عقوبة للغلط اللي تدار إلا لأولوية ماتنفداتش "فتواني قلال". واخا لغلط ماتعاقبش عليه فوقت لأولوية، لحكم كايعاقب عليه فأقرب وقيتة كايوقف فيها اللعب.[3]
لمعاودة د لبدية بدل
فاش لكورة كاتكون برّا التيران (خارجة)، كاتعاود لكورة تّلعب من جديد بالطريقة اللي كاتواتي كولّا حالة: نفتارضو كاينة فرقة (أ) مهاجمة وفرقة (ب) مدافعة:
- بدية بالصفارة: من مورا شي بيت، أولّا فلبدية ديال لميطا. (قانون 8)
- توش: فاش لكورة كاتقيس خطوط التوش؛ كاتعطى للفرقة اللي لاعبة ضد هاديك اللي خرجات ليها لكورة. (قانون 15) إلا كوايري من لفرقة (أ) خرج لكورة، لكوايري من فرقة (ب) هو اللي كايلعب التوش.
- ركنية: فاش كورة كاتخرج من خط لݣول بلا مايماركا بيت وإلا تقاست قبل ماتخرج من شي واحد فلفرقة لمدافعة. كاتعطى للفرقة لمهاجمة. (قانون 17) إلا لفرقة (ب) خرجو لكورة من خط لݣول ديالهوم، لكوايري من لفرقة (أ) هو اللي كايقصّر الركنية.
- ضربة مرمى: فاش كورة كاتخرج من خط لݣول بلا مايتماركا بيت وإلا تقاست قبل ماتخرج من شي واحد فلفرقة لمهاجمة. كاتعطى للفرقة لمدافعة. (قانون 16) إلا لفرقة (أ) خرجو لكورة من خط لݣول ديال لفرقة (ب)، لحارس ديال لفرقة (ب) نيت هو اللي كايقصر ضربة مرمى.
- ضربة غلط مانيشانش: كاتعطى للفرقة لخرة فأغلاط اللي ماكاتعطاش فيهوم كارطة، فلأغلاط التقنية، أولّا فاش اللعب كايتوݣف باش لحكم يخاصم على أولّا يدور فشي كوايري. صعيب بزاف لبيت يتماركا من ديك لبلاصة، من غير إلا قاسها كوايري آخور. (قانون 13) إلا شي كوايري من لفرقة (ب) دار شي غلط، لحكم كايعطي هاد الضربة للفرقة (أ) من بعيد.
- ضربة غلط نيشان: كاتعطى للفرقة لخرة ضد فلفرقة اللي دارت غلط. (قانون 13) من هاد لبلاصة يمكن لواحد لبيت يتماركا.
- پيلانتي: كاتعطى للفرقة لخرة فلمينطاقة د پيلانتيات ضد فلفرقة اللي دارت غلط اللي نورمالمو كايتعاقب عليه بضربة غلط نيشان. (قانون 14) إلا لفرقة (ب) دارت غلط فلمينطاقة دپيلانتيات ديالهوم، كايتعطى پيلانتي للفرقة (أ).
- كورة مليوحة: كاتعطى فاش لحكم كايوقّف اللعب على شي حاجة موهيمّة طرات، بحال إلا شي لعّاب كلا شي دقّة بلبيان، شي طرف خارجي دخل فلماطش، أولّا لكورة مابقاتش صالحة. (قانون 8)
غير لكورة كاتولّي برا التيران، كاتعاود لكورة تّلعب من جديد بالطريقة اللي كاتواتي كولّا حالة. داكشي اللي كايجي من مورا لحالة اللولة ماكايبدّلش الطريقة باش غايرجع لبالون. متلا، إلا خرجات كورة بسباب غلط دارتو فرقة (أ) ضد فرقة (ب)، الطريقة باش خاص تّعاود لكورة تقصّر هي ضربة غلط نيشان، واخا يجي كوايري من فرقة (ب) ويدير غلط على فرقة (أ) من بعد. واخّا هكاك، لحكم غايعاقب لكوايري ديال فرقة (ب) بكارطة صفرة أولّا حمرة، علا حساب شنو طرا.
لحكم واخا هكاك يقدر يبدّل لقرار ديالو (لبدية لأصلية) إلا لحكّام لمعاونين نبّهوه بلغلط اللي دار، هادشي قبل مايبدا اللعب. متلا، إلا خرجات كورة بسباب بيت ماركاتو فرقة (أ) ولحكم ݣال باللي لهدف صحيح، ولحكّام لمعاونين ݣالو ليه باللي كوايري ديال فرقة (أ) نيت دار شي غلط قبل مايتماركا لبيت، لحكم غادي يبدّل لقرار ديالو للبدية بضربة غلط للفرقة (ب) فلبلاصة اللي طرا فيها لغلط.
عيون لكلام بدل
- ^ "Laws of the Game 2019/20" (PDF). ص. 88. مأرشيڤي (PDF) من لأصل ف 2022-11-13. تطّالع عليه ب تاريخ 2021-07-31.
- ^ "Referee's signals: advantage". BBC Sport. 14 شتنبر 2005. مأرشيڤي من لأصل ف 16 يناير 2023. تطّالع عليه ب تاريخ 4 مارس 2011.
- ^ "Law 5: The Referee: Advantage" (PDF). Laws of the Game 2010/2011. FIFA. ص. 66. تطّالع عليه ب تاريخ 4 مارس 2011.
|
تقدر تزيد شوف بزاف د تّصاور و لمعلومات ديال كورة برا التيران ف ويكيميديا كومنز. |