ويكيپيديا:كناش لقواعد

هادي صفحة ديال لْحكام د لموسوعة. هاد صّفحة محمية و مايمكنش يبدل فيها غير مستخدم أمغار.

يلا بغيتي تقتارح شي تبديل ف لْقواعد د لّوغة، حلّ شي حلقة د نّيقاش ف ميزان لكلام ولا حلّ شي حلقة ف صّفحة د إمغارن.

حاول تقرا مزيان لّحكام د لّوغة ف لموسوعة قبل ما تقتارح شي موضوع ل نّيقاش.

تعليمات ل إمغارن لّي كايوتّقو لْقواعد ف هاد صّفحة:

  • كل حكمة خاصّها تّسجل على حساب آخر صيغة سالات بيها لحلقة ف ميزان لكلام.
  • لحكمة خاصّها تتحطّ ف كادر باين فيه : تّعريف و لّيستا د لقواعد لّي تّافقات عليهوم جّماعة.
  • دير عافاك ليان د نّيقاش (ولا ليانات ديال نّيقاشات يلا كانو بزّاف) و حطّ واش لحكمة إلزامية ولا غير توجيهية.

حكمة 1: لوصل بين لكلمات

لوصل بين لكلمات هو لخاصّية د دّاريجة لّي كاتربط بين جوج كلمات ب لهدف د نّسبة (متلا: لقتيصاد د لمغريب) ولا باش تشرح نّوع ديالها (متلا: كتاب ديال لماط).

لوصل بين لكلمات
لكلمات د لوصل
  • ديال: لبراد ديال جارتنا لباتول مازالا فيه ريحة الشيبا.
  • د: لكروصة د بوشعيب ولد مينة فرشخها لقايد.
  • تاع: شريت تقاشر تاع لقطن.
  • متاع: كاين تّوب متاع لمغريب و كاينين تّوابات متاع شّينوا.
  • نتاع: لمونتاخاب نتاع بوتسوانا تقصا من كاس إفريقيا.
لقْواعد
  • حروف رّبط و لوصل خاص يفصل بيناتهوم خوا ف لكتابة
  • ما عدا لحالات لّي فيهوم نّسبة ؛ متلا: ديالي، ديالو، ديالهوم.
  • لكلمات د لوصل لستيعمال ديالها ماشي إلزامي حيت ف دّاريجة يمكن بعض لمرّات يتربطو لكلمات بلا شي كلمة د رّبط (متلا: قتيصاد لمغريب).
  • لحلقة د نّيقاش منين خرجات لحكمة: دخل هنا - شاركو فيها: 4 د لخدايميا - تاريخ: 9 شتنبر 2020.
  • نوع لحكمة: إلزامية ف شّكل د لكتبة د لكلمات و لقضية د لخوا - توجيهية: ف لستيعمال ف حدّ داتو.

حكمة 2: لجرّ

لجر
لكلمات د لجرّ
  • من: فرقة وحدة من لمغريب لّي لعبات لفينال د كاس لعالم د لأندية.
  • ب: دّاريجة كاتّكتب ب حروف عربية.
  • ف: "وش بيك يا لي ما رينا لك ف لبكا امثيلا"
  • في: مصطفى كان يخدم في لاگار.  "طلبت لّيل يطول يطول * راحتي في ضي نجومو * بغيت نبقا سهران"
  • ل: "لمحبوب لّي نريد گاس ل طاطا" - "تبات باكية ل حبابك وعداك"
  • من: "قلبي ملسوع وايلي من حر التيهان"
  • على: "حجة على هل دّعوى ما نصغا كلام لايم"
  • عل: "جاد ب لغنايم و ب لورد و زّهر عل لطيار نّاشدا صبيهان"
  • كيف: كيف ما درنا معاك وحلة
  • كي: لخريطة د إيطاليا دايرة كي شي سبّاط
  • كيما: كيما دْرنا معاك وحلة
  • بحال/فحال: لمغريب بحال دّزاير عمّر شي واحد منّهوم دّا جايزة نوبل.
  • تا/حتّا/حتّى: سّاحل لأطلسي د لمغريب غادي من طنجة تّا/حتّا/حتّى ل لّگويرة.
لقْواعد
  • حروف لجر خاص يفصل بيناتهوم خوا ف لكتابة
  • ما عدا لحالات لّي فيهوم نّسبة ؛ متلا: مني، منو، منهوم.
  • لحلقة د نّيقاش منين خرجات لحكمة: دخل هنا - شاركو فيها: 4 د لخدايميا - تاريخ: 15 شتنبر 2020.
  • نوع لحكمة: توجيهية و ب الدّات ف لمسألة د لخوا بين لكلمات.

حكمة 3: لعطف

لعطف

ف لحالا إلا كانو جوج حوايج كيتربطو كانستعملو لحروف تّالية:

  • ربط
    • و: لمغريب و دّزاير
    • ؤ: لمغريب ؤ دّزاير
  • ختيار
    • ولا: لمغريب ولا دّزاير
لقْواعد
  • حروف لعطف خاص يفصل بيناتهوم خوا ف لكتابة.
  • لحلقة د نّيقاش منين خرجات لحكمة: دخل هنا - شاركو فيها: 8 د لخدايميا - تاريخ: 15 شتنبر 2020.
  • نوع لحكمة: إلزامية.

حكمة 4: الأسماء ؤ الأوصاف المؤنتة

الأسماء ؤ الأوصاف المؤنتة
  • السميات اللي جايين من كلمة عربية كاتسالي ب التا مربوطة (كورة، تصويرة، طنجة، اللخرة، االولة) كايتكتبو ب التا مربوطة.
  • تا ف لحالة اللي هاد لكلمات كايتربطو ب كلمات خرين وكاتنطق فيهوم "التا"، كاتبقا لكتابة ب التا مربوطة (محلبة الحسين، تقشيرة البشير، جيولوجية تونس...).
  • السميات "الڭاورية" المؤنتة يمكن يتكتبو ب الشّكال بجوج مع التفضيل ديال الألف ف لحالات اللي الليف كاتنطق فيها ممدودة بزاف (ماليزيا، إثنولوجيا، جيولوجيا) و التا مربوطة ف لحالات اللي المد فيها قصير/مزروب (ميطة، كاسيطة، بلاصة).
  • لحلقة د نّيقاش منين خرجات حكمة: دخل هنا - شاركو فيها: 10 د لخدايميا - تاريخ: 11 أكتوبر 2020.
  • نوع لحكمة: توجيهية.

حكمة 5: تّعريف

تّعريف د سّميات ؤ نّعوت
  • تّعريف د سّميات ؤ نّعوت كيتدار ب ل يلا كان لحرف لّول ڭمري، بحال:
    • باب >> لباب
    • كاميو >> لكاميو
    • فردي >> لفردي
    • مراكشي >> لمراكشي
  • تّعريف د سّميات ؤ نّعوت كيتدار ب ال ؤلا ب شّدة فوق لحرف لّول يلا كان لحرف لّول شمسي، بحال:
    • جاوج >> الجاوج / جّاوج
    • دار >> الدار / دّار
    • ساروت >> الساروت / سّاروت
    • زين >> الزين / زّين
  • يلا كان تّعريف ف لعنوان ديال صفحة د لمحتوى (مقال، تصنيف، قالب)، ؤ لحرف لّول د لكلمة شمسي خاص يكون ب ال ماشي ب شّدة. لموقابيل ب شّدة يقدر يتزاد ك تحويل.


  • لحلقة د نّيقاش منين خرجات لحكمة: ال vs شّدة - شاركو فيها: 8 د لخدايميا - تاريخ: 5 غشت 2022.
  • نوع لحكمة: توجيهية ف تّيكست، إلزامية ف لعناوين