ويكيپيديا

لحكم لمعاون بلڤيديو

لحكم لمعاون بلڤيديو أولّا لڤار (بالنݣليزية: Video assistant referee ولّا VAR) هو حكم فلماطش ديال كورة كايعاون لحكم د الساحة بلكليپات ديال لڤيديو وصنّاطات ديال لهضرة. هاد لحكم كايعاون يطيّح لعدد ديال لغلاط لبشريين اللي كايديرو تأتير كبير على النتيجة د لميطشان.

لعلامة ديال لڤار فكاس لعالم د 2018.

تكتب لڤار فلقواعد د اللعبة ف 2018 من مورا بزاف ديال التجاريب فبوطولات كبار.[1] السيستيم ديال لڤار كايعاون باش يتصححو لغلاط "لباينين ولواضحين" و"لحوادت اللي تفلّتو فالتيران"[2] بلفلسافة ديال "تدخّول قليل ومنفعة كبيرة".[3][4]

الطاريقة بدل

 
حكم كايتأكد من النصيحة ديال لڤار فالتلفازة.

كاينين ربعة ديال لحالات اللي لحكم فيهوم كايرجع للحكم لمعاون بلڤيديو:[2]

التأكود بدل

لفرقة ديال لڤار اللي كاينة فبيت لڤار (VOR) كاتأكد من أي قرار ديال لحكم متعلّق بوحدة من دوك الربعة دلحالات اللي كاينين لفوق. إلا مالقاش لڤار شي غلط كايدوز كولشي بيخير وهاد التأكود كايتسمى "تأكود ساكت". بعض لمرات إلا لڤار بان ليه باللي لحكم دار شي غلط، كايسرسر ليه فودنيه وكايعلمو باللي شي حاجة طارية. لحكم كايسمع للنصيحة (كايوقّف اللعب إلا كانت لكورة ملعوبة) وكايدير وحدة من هاد التلاتة:[5]

  • كايبدّل لقرار ديالو على النصيحة د لڤار
  • كايمشي يشوف اللقطة د لڤيديو فالتلفازة د التيران
  • كايميّك على النصيحة د لڤار.

لقرار اللخر فأي حاجة طرات فالتيران كايبقى ديال لحكم بوحدو.[6]

لغلاط بدل

 
حكام معاونين ديال لڤار فماطش ديال لبوطولة د السعودية.

كاينين بزاف ديال لعقوبات فلقواعد د اللعبة اللي كاتعطى فحق أي واحد دار شي حاجة ضد لڤار. كاتعطى كارطة صفرة لكوايرية ولمسؤولين د لفرقة إلا دارو ليشارة ديال لڤار (ليشارة ديال التلفازة) بيديهوم بزاف دلمرّات. كاتعطى صفرة لأي واحد مشى للبلاصة اللي محطوطة فيها التلفازة د لڤار. الدخول للبيت د لڤار كايخرّج مول لفعلة من التيران.

ڤار معاون بدل

لحكم لمعاون د لڤار (AVAR) هو حكم اللي كايعاون لڤار فلبيت ديالو. لمسؤوليات ديال لAVAR هي يتفرج فلماطش مباشر فاش لڤار كايدير مراجعة لشي لقطة ديال لڤيديو، يسجل لحوايج اللي كايستاهلو مراجعة، ويعطي النتيجة ديال شي مراجعة للناس اللي مدوزين لماطش فلقنوات د التلفازة.[2]

نتيقاد بدل

 
قرار ديال لڤار فماطش ديال لپريمر ليݣ.

تنتاقد التخدام ديال لڤار فكاس لكونفيديراليات د 2017 من مورا بزاف ديال التدخولات اللي دارهوم. بزاف ديال الناس تّاهمو لڤار باللي "زاد دوّخ الناس كتر مما وضّح ليهوم لومور".[7][8]

أشهر لقطة تعرفات من عند شي كوايري نتاقد لڤار فالتيران هي لفعلة اللي دار لكوايري لمغريبي نور الدين أمرابط فكاس لعالم د 2018. من مورا ماحسب لحكم لبيت التاني للبرطقيز بسباب نصيحة ديال لڤار، تشارشا نور الدين ومشا لأقرب كاميرا، دار ليشارة لڤار وهو كايݣول: "VAR, it's bullshit" (نݣليزية: ڤار، إتس بولشيت، هاد لڤار راه شي حاجة تافهة). لڤار كان حرّم على لمونتخاب د لمغريب ربحة تاريخية على لمونتخاب دلبرتقيز.[9]

واحد لحاجة خرة تنتاقد عليها لڤار فكاس لعالم 2018 هي فاش كايطوّل لميطشان بالتدخولات ديالو. لمعدّال ديال لمدة دالتدخول دلڤار هي 80 تانية كولّا مرة.[10] لعدد ديال پيلانتيات اللي تزاد فالتورنوة كان بسباب لڤار اللي كايحاسب على لغلاط، واللي كون ماشي هو ݣاع دوك لغلاط ماتعطات ليهوم لعقوبة اللي يستاحقّو.

فلمغريب مشات لينتيقادات ديال لڤار من ناحية ديال لفلوس. بزاف نتاقدو التمن لغالي ديالها، واللي كايوصل ل 12 مليون درهم فلعام (50 آلف درهم للماطش و400 آلف درهم للدورة) فبوطولا 1 بوحدها. بلمقارنة معا هادشي، لمينحة اللي كاتعطى للبطل ديال بوطولا 1 مافايتاش 3 دلمليون درهم، أولّا الربع ديال شحال باش كاتخدم لڤار.[11] نتيقاد آخور جا للڤار من لجمهور وحتى لفراقي بسباب ليستيعمال وليدارة لخايبة دلميطشان. فبوطولا 1 د 2019-20، شي حكام خدّمو لڤار كتر من لقياس، وفراقي ݣالو باللي ضلمهوم فحقهوم، وفراقي بحال مولودية وجدة والرجاء البيضاوي مشاو تشكاو للجامعة على هادشي.[12]

عيون لكلام بدل

  1. ^ "Historic step for greater fairness in football". International Football Association Board. 3 مارس 2018. مأرشيڤي من لأصل ف 30 يناير 2023. تطّالع عليه ب تاريخ 3 مارس 2018.
  2. ^ a b c "video assistant referees (vars) Protocol". International Football Association Board. 26 أبريل 2017. مأرشيڤي من لأصل ف 2019-05-08. تطّالع عليه ب تاريخ 26 أبريل 2017.
  3. ^ Staff writers (20 يونيو 2018). "World Cup 2018: VAR helps tournament reach 10 penalties – so is it working?". BBC Sport. مأرشيڤي من لأصل ف 23 ماي 2023.
  4. ^ Staff، S. V. G. "EVS Xeebra Replay System Facilitates VAR Implementation for Copa do Brasil Tournament". Sports Video Group. مأرشيڤي من لأصل ف 2023-05-23. تطّالع عليه ب تاريخ 2021-09-01.
  5. ^ "VIDEO ASSISTANT REFEREES (VAR)". FIFA. 22 يوليوز 2021. مأرشيڤي من لأصل ف 2021-08-15. تطّالع عليه ب تاريخ 22 يوليوز 2021.
  6. ^ "VAR at the 2018 FIFA World Cup™". FIFA. 22 يوليوز 2021. مأرشيڤي من لأصل ف 2021-08-05. تطّالع عليه ب تاريخ 22 يوليوز 2021.
  7. ^ McNulty, Phil (2 يوليوز 2017). "Confederations Cup: Video assistant referee system 'a shambles'". BBC Sport. مأرشيڤي من لأصل ف 23 ماي 2023. تطّالع عليه ب تاريخ 9 مارس 2018.
  8. ^ Ogden, Phil (2 يوليوز 2017). "VAR creates as much confusion as clarity in Confederations Cup final". BT Sport ESPN. ESPN, Inc. and BT Group. مأرشيڤي من لأصل ف 13 ماي 2023. تطّالع عليه ب تاريخ 9 مارس 2018.
  9. ^ Morgan, Jessica (26 يونيو 2018). "World Cup 2018: 'VAR is bull***t', says Morocco's Nordin Amrabat as he fumes after Portugal decision". independent.co.uk. مأرشيڤي من لأصل ف 26 يناير 2023. تطّالع عليه ب تاريخ 1 شتنبر 2021.
  10. ^ Sengupta، Ayon (2 يوليوز 2018). "Mixed response for VAR". The Hindu (ب نڭليزية). مأرشيڤي من لأصل ف 23 ماي 2023. تطّالع عليه ب تاريخ 4 يوليوز 2018.
  11. ^ حمزة بوملال (24 شتنبر 2019). "مليار و200 مليون تكلفة "الفار" لموسم واحد بالبطولة الإحترافية". lesiteinfo.com. مأرشيڤي من لأصل ف 12 غشت 2022. تطّالع عليه ب تاريخ 1 شتنبر 2021.
  12. ^ "حكم الفيديو يثير أزمة وجدلا في الدوري المغربي". alarab.co.uk. 18 غشت 2020. مأرشيڤي من لأصل ف 1 شتنبر 2021. تطّالع عليه ب تاريخ 1 شتنبر 2021.
  تقدر تزيد شوف بزاف د تّصاور و لمعلومات ديال Video assistant referee ف ويكيميديا كومنز.
  تقدر تزيد شوف بزاف د تّصاور و لمعلومات ديال Video assistant referee ف ويكيميديا كومنز.
مرجّعة من "https://ary.wikipedia.org/w/index.php?title=لحكم_لمعاون_بلڤيديو&oldid=324840"