كريپطوصولدي

لكريپطوعوملة ؤلا كريپطوصولدي ؤلا عوملة مكريپطية ؤلا بختيصار لكريپطونّݣليزية Cryptocurrency) هيّا قيمة ديجيطالية ؤ صولدي رقمي (ؤلا عوملة رقمية)، مديورة باش تخدم كا وسيلة ديال تّبادل، لّي كتسجّل فيها لملكية لفردية ؤ تّبادلات ديالها ف واحد لكنّاش ديجيطالي، علا شكل بازدّوني كتستعمل ألݣوريتمات ديال لكريپطوݣرافيا. لكريپطوات عاداتن ماكاتكونش عندها شكل فيزيكي ملموس (عكس لفلوس لعاديين)، ؤ ماكاتصدرهاش شي سلطة مركزية. لكريپطوات عاداتن كيخدمو بشكل مديصونطراليزي بحيت ماكاتكونش شي سلطة ؤلا مؤسسة ؤلا فرد متحكم ف لإصدار ؤلا ف لقيمة ؤ لا ف تّعاملات ديالها. ف هاد لحالة لكريپطو كتستعمل طّيكنولوجيا ديال لكناش لموزّع، لّي كيتأمپليمونطا ب لبلوكتشيين، لّي هيّا بحال بازدّوني عمومية كتسجّل تّعاملات لمالية، ؤ كيقدر أي واحد يشوفها ؤ يعرف شنو طاري فيها.[1]

لّوݣو ديال بيتكوين، أول كريپطوصولدي تّختارع ف 2009

حاليان كاينين كتر من 8000 كريپطوصولدي ف تّداول،[2] ؤ أشهر ؤ أكبر وحدين هوما بيتكوين ؤ إيثيريوم. لقيمة لإجمالية ديال سّوق د لكريپطو وصلات ل حد أبريل 2021 ل 2.2 ترليون دولار ميريكاني.[1]

من حيت لقيمة ديالهم كاينين جوج نواع ديال لكريپطوصولديات هوما لكريپطوات لعاديين لّي كتطلع ؤ كاتنزل لقيمة ديالهم على حساب لعرض ؤ طّلب ف سّوق ديال تّعاملات، ؤ لكريپطوات لّي لقيمة ديالهم كتبقا تابتة ؤلا قريبة من شي قيمة محددة (بحال 1 دولار ميريكاني)، هادو كيتسمّاو لكريپطوتابتاتنّݣليزية Stablecoins).

تّاريخ بدل

قبل مايبان أول كريپطوصولدي لي هوّا بيتكوين، كانو ديجا أفكار ؤ قتيراحات غاديين ف نفس لتيجاه ديال لكريپطوصولديات، بحال لپروطوكول د إيكاش، لّي ختارعو ديڤيد تشاوم ؤ ستيفان براندز ف 1983، لّي عكس لبيتكوين كان كيحتاج ل سلطة مركزية (بحال بانكة) باش تجيري سّيستيم.[3] ف سّنوات لّي موراها بانو أفكار عندها علاقة معا لمفهوم د لپروڤ د لخدمة، ؤ لفوايد ديالو، متلا ف لحد من سپام ف لإيميلات. هاد لمفهوم كيلعب دور لوّلي (رئيسي) ف طّيكنولوجيا د لبيتكوين.

ف 1996، لاجونص لوطنية د لأمن ف لميريكان نشرات ورقة د بحت ب عنوان How to Make a Mint: the Cryptography of Anonymous Electronic Cash (كيفاش تصك لفلوس: لكريپطوݣرافيا ديال كاش إيليكطروني أنونيم) لي كاتوصف سيستيم ديال كريپطوصولدي، ؤ تنشرات ف ليستة د لميلاج ديال إم أي تي، ؤ من بعد ف جّورنال لعلمي The American Law Review.[4]

من بين أول قتيرحات ديال كريپطوصولدي كانو ديال لمهندس شّينوي ويي داي ف 1998،[5] ؤ ديال لعاليم د لحواسب لميريكاني نيك صابو، لّي ختارع لبيت ݣولد ف 2005. هاد لبيت ݣولد وخا داكشي ماكانش مأمن مزيان ضد لهجمات من نوع سيبيل.[3]

عيون لكلام بدل

  1. ^ a b "What Is Cryptocurrency? Here's What You Should Know [شنو هوما لكريپطوعوملات؟ ها لّي خاصّك تعرف]" (ب نڭليزية). 22 أبريل 2021. مأرشيڤي من لأصل ف 2022-02-23. تطّالع عليه ب تاريخ 2021-05-18.
  2. ^ "10 Important Cryptocurrencies Other Than Bitcoin" (ب نڭليزية). 22 يناير 2022. مأرشيڤي من لأصل ف 2023-10-15. تطّالع عليه ب تاريخ 23 يناير 2022.
  3. ^ a b "Bitcoin and Beyond: A Technical Survey on Decentralized Digital Currencies" (PDF) (ب نڭليزية). مأرشيڤي (PDF) من لأصل ف 2023-05-29. تطّالع عليه ب تاريخ 2022-02-06.
  4. ^ لو، لوري؛ صابيت، سوزان؛ صوليناس، دجيري (11 يناير 1997). "How to Make a Mint: The Cryptography of Anonymous Electronic Cash". American University Law Review. 46 (4). مأرشيڤي من لأصل ف 12 يناير 2018. تطّالع عليه ب تاريخ 6 فبراير 2022.
  5. ^ "bmoney, Wei Dai" (ب نڭليزية). مأرشيڤي من لأصل ف 2023-10-10. تطّالع عليه ب تاريخ 2022-02-06.

شوف تا بدل

  تقدر تزيد شوف بزاف د تّصاور و لمعلومات ديال Cryptocurrency ف ويكيميديا كومنز.