حبس قارا

موقع ديال الترات التقافي ف المغرب


حبس قارا ؤلا سّرداب ؤلا دّهليز ؤلا حبس نّصارا هيّا معلامة تاريخية كاينة ف مكناس، ؤ ب تّحديد ف لقصبة لإسماعيلية.[1] ؤ هيّا عيبارة علا شومبرات كبار تحت لرض، ب ساريات عراض، لي تّبنات ف لبدية د لقرن تمنطاش، ب أمر من سّلطان مولاي سماعيل.[2] وخا حبس قارا معروف سيرتو كا حبس فين كانو كيتسجنو لؤروپيين لي تقبطو ف لبحر من طاراف لقراصنة، أغلبية د لحرايفية د تّاريخ متافقين بلي لستيعمال لأصلي ؤ رائيسي ديالو كان كا بلاصة د لخزين ديال لماكلة ؤ دّوزان د لعساكريا.[3][4]

حبس قارا
حبس قارا
معلومات عامة
نوع حبس و موقع تراثي
لبلاد لمغريب
لموضع مكناس
لمدينة مكناس
تصنيف تراتي ترات تقافي ديال لمغريب و جزء من مواقع التراث العالمي


سّمية بدل

وحدة من رّوايات علا لأصل ديال حبس قارا كاتݣول بلي سميتو جات من سّمية ديال محابسي برطقيزي لي كان موهنديس معماري ؤ دار تّخطيط ديال لبلاصة موقابيل باش سّلطان مولاي سماعيل يعطيه لحرية ديالو. رواية خرة كاتݣول بلي سّمية كاترجع ل فترة د ليستيعمار، ؤ جات من لّاقاب لي تّعطا ل لمسؤول علا لحبس لي كان قرع.[1]

أساطير محلية بدل

بزاف د لقيصاص ؤ لأساطير تنسجو علا حبس قارا. من بينهوم لي كاتݣول بلي هوّا لابيرانت (متاهة) لي كاتمتد تحت مكناس كولها، ؤلا حتا واصلة جيهت مراكش ؤلا تازة. لعاداد د نّصارا لي كانو محبوسين فيه حتا هوّا تبالغ فيه، لا ف لكتابات د لؤروپيين والا ديال لمغاربا. لعاداد لحقيقي غالبا كان مابين 500 ؤ 800 محابسي ؤروپي. ؤسطورة خرة كاتݣول بلي ماكانو عندو حتا شي بيبان ؤلا سراجم، ؤ بلي دّخلة لواحيدة ليه كانت فتحة ف سّقف ديالو. حجّايات كانو كيتداولو علا لأرواح شّريرة ؤ لّعنات ديال لمحابسيا لي ماتو تماك. ؤسطورة تالتة كانت كاتݣول بلي مولاي سماعيل دار شي خرجة سرية د لهروب، ؤ بلي لي لقاها كيتجازا ب لحرية ديالو.[1]

لمعمار ؤ لبني بدل

حبس قارا كاين نيشان تحت سّاحة لي قدام قبة لخياطين. لبلاصة لمفتوحة منو فيها تلاتة د شّومبرات واسعين ب سقف عالي ؤ ساريات كبار. لباقي منو كانو سّلطات لفرانساوية سدّوه، بعدما وقعو حالات ديال مستكتشيفين لي ضاعو تماك ؤ ماعاودوش بانو. كاينين شحال من بلايص د لخزين تحت لقصبة، ولاكين مامعروفش واش كولهوم مرتابطين ب بعضياتهوم.[1]

علا حساب لمؤرخ لمغريبي عبد الرحمان بن زيدان، لبني ديال لموضع صحيح ؤ متقون حيت "لمراكبيا كيدوزو فوق منو، لبهايم كيجرو حجر كبير، ؤ لمركبات د لبوخار كيدوزو فوق منو ليل ؤ نهار، ؤ زيد عاد تزرعو فوق منو جنان ؤ شجر لي كيتسقاو مرة مرة، بلا مايأتر هادشي علا لهيكل ديالو".[1]

لبلاصة تّحتلرضية ف لغالب ماتحفراتش، مي ب لعكس، تّبنات هيّا لّولة، عاد تسقفات ؤ تدارت لقصبة فوق منها.[1]

تّاريخ بدل

حبس قارا تّبنا كا ݣزو من لقصبة لإسماعيلية ف مكناس، لي كانت لعاصيمة ديال سّلطان مولاي سماعيل. لختيار د مكناس، لي ماكانت عندها حتا شي أهمية تقافية ؤلا عيلمية ؤلا سياسية قبل من هاد زّمان، كان ل أهداف سطراتيجية (لموراقبة ديال لأطلس لمتوسط) ؤ باش مولاي سماعيل يخلي لبصمة ديالو ف تّاريخ د لمغريب ف بلاصة جديدة ديالو، لي ماكانوش فيها أتار ديال سلالات حاكمة ؤلا سلاطين قبل منو فيها.[1]

لبلاصة تحتلرضية ؤ لقصبة كاملة ف لغالب تّبناو علا دّروعا ديال محابسيا ؤ عبيد.[1]

لقرن لعشرين بدل

ف لفترة لستيعمارية، كانو سّلطات لفرانساوية كيستعملو حبس قارا مرة مرة باش يشدو لموقاويمين لمغاربا. شي دهاليز فيه تسدّو ب سّيما ف هاد لعوام باش مايبقاوش نّاس يتّجلاو فيهوم.

عيون لكلام بدل

  1. ^ a b c d e f g h "زمان، حبس قارا" (ب لعربية). 20 مارس 2015. مأرشيڤي من لأصل ف 16 شتنبر 2018.
  2. ^ "Visit Meknes, HABS QARA" (ب لفرانساوية). مأرشيڤي من لأصل ف 2023-05-31. تطّالع عليه ب تاريخ 2021-10-23.
  3. ^ Parker، Richard (1981). A practical guide to Islamic Monuments in Morocco. Charlottesville, VA: The Baraka Press.
  4. ^ Patrick Boucheron, Jacques Chiffoleau (2004). "LES PALAIS DANS LA VILLE, Espaces urbains et lieux de la puissance publique dans la Méditerranée médiévale" (ب لفرانساوية). doi:10.4000/books.pul.19255. Cite journal requires |journal= (معاونة)CS1 maint: uses authors parameter (link)