لبلوكتشييْننّݣليزية blockchain) هيّا ليستة ديال تّسجيلات دّيجيطالية كيتسمّاو بلوكات (مفرد بلوك)، لّي كيتربطو بيناتهم ب ستيعمال لكريپطوݣرافيا. كولا بلوك فيه كريپطوهاش ديال لبلوك لّي سابقو ؤ توقات (تحديد ديال لوقت فوقاش طرات موعاملة)، ؤ زيد عليهم لمعلومات ديال لموعاملة. تّوقات كيتبت بلي لموعاملة طرات ف لوقت لّي لبلوك ولّا مفتوح ل لعموم. هاد لبلوكات، لّي كولا واحد منها فيه لهاش ديال لّي سبقو، كيشكلو سنسلة، لّي كولا بلوك فيها كيرونفورصي لّي سبقو. داكشي علاش لبلوكتشيين صعيب باش تتبدل لمعلومات ديالها حيت مايمنكش يتبدل بلوك بلا مايتبدلو لبلوكات لّي تابعينو.[1]

كيفاش كتخدم لبلوكتشيين
كيفاش كتخدم لبلوكتشيين

لبوكتشيين عادة كيجيريهم ريزو پيرتوپير، لّي كيتّستعمل كا كناّش موزّع. هاد رّيزو مكون من عݣدات كيتبّعو پروطوكول محدّد باش يتبادلو لمعلومات بيناتهم ؤ يڤاليديو لبلوكات.[1]

طّيكنولوجيا ديال لبلوكتشيين ختارعها شي شخص ؤلا مجموعة د لأشخاص لّي خدا ؤلا خداو لپسودو ديال ساطوشي ناكاموطو ف 2008، باش يكون كنّاش موزّع ديال لكريپطوعوملة بيتكوين. لهوية ديال ناكاموطو ل حد سّاعة مامعروفاش. وخا تّطبيق لّول ديال لبلوكتشيين كان ف لكريپطوعوملات، هاد طّيكنولوجيا صالحة ل تطبيقات كتيرة بحال لكونطرات دّكية،[2] ف لّوعاب د تّيليجو، ف لمجالات ديال طّاقة ؤ لبانكات، ؤ ف أي مجال لّي كيحتاج ل تّيقة ؤ تّحقيق د لهوية، بحال ف طّرونسپور ديال لمنتوجات بشكل أوطوماتيكي، لّي دارتو شركة ديال والمارت ف كانادا. ؤ كاينين تطبيقات موستقبالية بحال لإتبات ديال لملكية[1] ؤ لنتيخابات، وخا كاين باقي نيقاش بين لمختصين واش تّطبيق ديال لنتيخابات مومكين ؤلا لا.[3]

حيت ماكايناش سلطة مركزية لّي كتڤاليدي لهوية باش تحقق تّيقة، هاد لعملية كتكون موزّعة ف رّيزو كامل، ؤ كتخلي تّطبيق سريع ؤ فعّال، ؤ مبدئيا ماشي قابل ل لختيراق، حيت ماكاينش شي بلاصة محددة لّي لهاكر يقدر يآطاكيها. هادشي ماكيمنعش بلي كاينين طرقان باش تّهاكا بلوكتشيين، سيرتو فاش رّيزو ديالها كيكون باقي صغير، مافيهش عݣدات بزاف، بحال لهجمة ديال 51%، لّي كيسيطر فيها شي حد علا 51% ديال لعݣدات ؤلا كتر، ؤ كتولي عندو ف هاد لحالة لأغلبية ديال لأصوات ف لڤوط علا لبلوكتشيين، شّي لّي كيخلّي عندو لقدرة باش يبدلها كيفما بغا.[4]

تاريخ بدل

نقدرو نݣولو بلي لبلوكتشيين حلّات واحد لموشكيل قديم بزاف، ؤ هوّا كيفاش عاداد كبير بزاف د نّاس يقدرو يتعاملو بيناتهوم بلا مايحتاجو يتيقو ف بعضياتهوم ؤ ف نفس لوقت مايحتاجوش سلطة مركزية، حيت سّيستيم لموزع د بلوكتشيين براسو هوّا لي كيضمن هاد تّيقة. ف أزمنة قديمة ماكانش هاد لموشكيل مطروح حيت بنادم كان عادتن كيعيش ف جماعات صغيرة لي لأفراد ديالها كيعرفو بعضياتهوم حياتهوم كاملة، ؤ ف حالت يلا شي حد خان تّيقة، جميع لمعارف ديالو كاتوصلهوم لهضرة، ؤ يقدر يتعرّض ل طّرد من جّماعة، شي لي ف داك زّمان كيعني لموت. معا مرور لوقت فاش كبرات لمجتمعات، ؤ ولاو ناس ماكيعرفوش بعضياتهوم خاصهوم يتعاملو معا بعضياتهوم ب شكال مختالفين (تبزنيس، مبادلات، مصاحبة، جواج...) واحد من لحلول د لمعضلة د تّيقة كان هوّا سّلطة لمركزية لي كاتضمن لقيمة ديال تّعاملات ؤ كاتحل لمطايفات. هاد لحل ماشي ميتالي حيت نّاس لي شادّين سّلطة يقدرو يستاغلوها ل مصالحهوم، ؤلا مايسيروهاش مزيان ؤ يخرجو علا لقتيصاد ؤ لمجتمع، بحال لي كيبان فاش كاتطرا أزمة قتيصادية.[5] مفاهيم بحال لّامركزية ؤ دّيموقراطية هوما محاولات باش نتجنبو بحال هاد لإشكال ديال ستيغلال سّلطة لمركزية، ؤ يكون لقرار موزّع كتر ف "رّيزو" لقتيصادي ؤ سّياسي ؤ لمجتمعي. لبلوكتشيين حيت كاتعطي سّلطة ل رّيزو كامل بشكل ديموقراطي، نقدرو نݣولو بلي هيّا لحل لي كيعطي لحالة لّخرانية ؤ لكاملة ديال توزيع لقرار، ف ريزو لي لعݣدات ديالو ماكيعرفوش بعضياتهوم ؤ ماعندهومش ب ضّارورة تيقة متبادلة، من غير تّيفاق علا لپروطوكول ديال بلوكتشيين. وخا داكشي، علا حساب بزاف د لحرايفية د لانفورماتيك حنا باقيين ف ليامات لّولة ديال هاد طّيكنولوجيا، لي باقي خاصها بزاف د تّطوير باش لپوطونسييل ديالها يبان بشكل واضح.[6]

لمزايا ديال بلوكتشيين بدل

لبلوكتشيين عندها واحد لعاداد د لمزايا من بينهوم:[7]

  • كناش موزع: جميع لموعامالات لي كيطراو ف لبلوكتشيين كيكونو موجودين ف رّيزو علا شكل كناش موزع علا لعݣدات د رّيزو كاملين. نقدرو نݣولو بلي لبلوكتشيين هيّا بازدّوني موزعة ف ريزو بلاصت ماتكون مصوڤية ف بلاصة وحدة بحال سيرڤور.
  • ديجيطالية: لمعلومات ديال لبلوكتشيين كاينين كاملين ف وسط ديجيطالي (ف ؤرديناطور ؤ أنترنيت) شي لي كيحيد صّداع ديال لوراق ؤ لخدمة د ليد.
  • تبدال فيساع ؤلا علاين فيساع: لأپدييت ؤلا تّبدال ديال لمعلومات كيتدار فيساع، يعني ف مدة قصيرة بزاف مورما كاتطرا شي عملية.
  • كرونولوجية ؤ ب توقات: لبلوكات ديال لبلوكتشيين كيكونو متابعين علا حساب لوقت فوقاش طراو، ؤ كولا وحدة منهوم كيكون فيها لوقت لي طرات فيه. هاد لبلان كيتسما "توقات"، يعني تحديد د لوقت فاش طرات شي عملية ديجيطالية.
  • مكريپطية ؤ ماشي ساهل تزوّر: جميع لمعلومات ديال لبلوكتشيين كاتكون مكريپطية، ؤ كولا بلوك كيكون فيه هاش ديال لبلوكات لي سابقينو. هادشي كيضمن بلي ضّونيات (معلومات) ديال لبلوكتشيين كيتصيفطو بشكل مضمون ؤ مختاصر ؤ سريع. ؤ لبلوكتشيين كاتكون موزعة ف لعݣدات د رّيزو كامل، شي لي كيعني بلي لبلوكتشيين علاين مستحيل باش يتبدلو ؤلا يضيعو ضّونيات دياولها.
  • مبنية علا لإجماع: أي عملية كاتطرا ف رّيزو ديال لبلوكتشيين ماكاتڤاليدا غير يلا أغلبية د لعݣدات ف رّيزو قبلو بيها. تّفاصيل ديال كيفاش كيطرا لإجماع كاتكون علا حساب لالݣوريتم لي مطبق ف لبلوكتشيين.
  • موتاحة ل أي واحد ف رّيزو: أي واحد دخل ل رّيزو ديال شي بلوكتشيين يقدر يطيليشارجيها ؤ يطّالع علا لمعلومات لي فيها.
  • مديصونطراليزية ؤ موزّعة: ماكاينش شي صونطر ؤلا سلطة مركزية لي عندها لقرار لّخراني ؤلا كاتسيطر علا لبلوكتشيين. جميع لعݣدات د رّيزو متساويين ف لقرار ؤ تّحكم ف لبلوكتشيين، ؤلا علّقليلة كاينة إمكانية باش يكون عندهوم.
  • مبدئيا ماكاتحتاجش ل طرف تالت: علّاقل نضريا بنادم مايحتاجش ل شي طرف تالت (سوفتوير إضافي متلا) باش يتعامل معا لبلوكتشيين، من غير سّوفتوير رّئيسي لي مديور ليها (متلا بيتكوين كور ب نّسبة ل بيتكوين).

نواع د لبلوكتشيين بدل

نقدرو نقسّمو لبلوكتشيين ل شلا نواع علا حساب 5 د لكريطيريات: نوع د تّخدام (واش عام ؤلا خاص)، نوع د لاكصي (واش مفتوح ؤلا مسدود)، نّوع د لإجماع ؤلا لالݣوريتم د لإجماع (بحال لپروڤ د لخدمة، لپروڤ د لميزة، ؤ غيرهوم)، لكونطرات دّكية (واش كاينين ؤلا لا)، ؤ واش مديور فوق منها كريپطوصولدي ؤلا لا.

نوع ؤلا لمستوى د تّخدام بدل

لبلوكتشيينات كاين منهوم لي عندو ستيعمالات خاصة، بحال بيتكوين لي مديور غير كا كريپطوصولدي، ؤ لي عندو ستيعمالات عامة، يعني يقدرو يتديڤلوپاو ؤ يتخدّمو فيها بزاف د تّطبيقات، لي يقدر يكون منها لكريپطوصولدي ؤ غيرها، بحال إيثيريوم ؤ هايپرليدجر.[8]

نوع د لاكصي بدل

لعادي ف لبلوكتشيين هوّا باش تكون مفتوحة ل أي واحد بغا يطّالع علا لمعلومات لي فيها. هاد لمبدا ديال شّفافية ضاروري باش ماتكونش سّلطة علا لبلوكتشيين ف يد شي فرد ؤلا مؤسسة ؤلا جماعة. وخا داكشي، علا ود لحماية د لخصوصية ؤ لملكية د شّركات، كاينين بلوكتشيينات، بحال هايپرليدجر، تطورو باش يكونو محدودين ف لاكصي غير ل لأفراد ؤلا سّيستيمات لي مسموح ليهوم. هاد نّوع ديال لبلوكتشيينات لمسدودة كاتخرق جزئيا لمبدا د لّامركزية لي هوّا سّاس د طّيكنولوجيا د بلوكتشيين.[9]

عيون لكلام بدل

  1. ^ a b c "The great chain of being sure about things" (ب نڭليزية). 31 أكتوبر 2015. مأرشيڤي من لأصل ف 8 يناير 2019.
  2. ^ "Leaderless, Blockchain-Based Venture Capital Fund Raises $100 Million, And Counting" (ب نڭليزية). 15 ماي 2016. مأرشيڤي من لأصل ف 2023-06-28. تطّالع عليه ب تاريخ 2021-05-18.
  3. ^ "New MIT Paper Roundly Rejects Blockchain Voting as Solution to Election Woes" (ب نڭليزية). 16 نونبر 2020. مأرشيڤي من لأصل ف 2021-08-21. تطّالع عليه ب تاريخ 2021-05-18.
  4. ^ "Bitcoin Spinoff Hacked in Rare '51% Attack'" (ب نڭليزية). 29 ماي 2018. مأرشيڤي من لأصل ف 2022-10-03. تطّالع عليه ب تاريخ 2021-05-18.
  5. ^ "The Age of Trust — the problem blockchain solves that others cannot [لعصر د تّيقة. لموشكيل لي حتا حاجة خرة ماتقدر تحلو من غير لبولكتشيين]" (ب نڭليزية). 13 دجنبر 2018. مأرشيڤي من لأصل ف 2023-06-23. تطّالع عليه ب تاريخ 2021-09-11.
  6. ^ "Blockchain Technology: Can It Really Solve The Problem Of Trust In A Centralized World?" (ب نڭليزية). 15 يونيو 2020. مأرشيڤي من لأصل ف 2021-10-26. تطّالع عليه ب تاريخ 11 شتنبر 2021.
  7. ^ "Key Characteristics of the Blockchain" (PDF) (ب نڭليزية). مأرشيڤي (PDF) من لأصل ف 2023-01-23. تطّالع عليه ب تاريخ 2021-09-13.
  8. ^ شيهو ساريكتودو، هدى إبراهيم، علوية عبد الوهاب (27 شتنبر 2018). "Taxonomy development of Blockchain platforms: Information systems perspectives" (ب نڭليزية). AIP Conference Proceedings. doi:10.1063/1.5055532. Cite journal requires |journal= (معاونة)CS1 maint: uses authors parameter (link)
  9. ^ "Public Vs Private Blockchain: The Ultimate Comparison" (ب نڭليزية). 10 يناير 2021. مأرشيڤي من لأصل ف 2023-03-27. تطّالع عليه ب تاريخ 2021-09-14.
  تقدر تزيد شوف بزاف د تّصاور و لمعلومات ديال Blockchain ف ويكيميديا كومنز.