لغزو النورماندي ل النݣليز

لغزو نّورماندي ل نّڭليز هوّا مجموعة د لأحدات تّاريخية لّي طرات ف نّڭليز معا لبدية ديال عام 1066، لّي أدّات ل سّيطرة ديال نّورمانديين ؤ تّتويج ديال ويليام لفاتح كا ماليك علا نّڭليز.

نّورمانديين براسهم كانو مجموعة ديال لقبايل دّانماركية لّي ستاقرات ف نورمانديا ف شّمال لغربي ديال فرانسا، ف لبدية ديال لقرن لعاشر. ف 912، زّعيم ديالهم رولو نّورماندي غادي يدير تفاهم معا لماليك د فرانسا شارل لبسيط بحيت غادي يعتارف بيه كا ماليك عليه، موقابيل باش لماليك يقبل سّلطة ديال نّورمانديين علا لمنطقة فين كانو مستاقرين، ؤ غادي يولي رولو أول دوك ديال نورمانديا. نّورمانديين معا مرور زّْمان غادي يتخلاو علا لّوغة د جدودهوم، ل صالح لفرانساوية لقديمة، ؤ غادي يطورو وحدة من أعضم تّقافات ديال ؤروپا ف داك لوقت، ؤ لجيش ديالهوم غادي يولي أقوى جيش ف ؤروپا. من لقرن لعاشر ؤ لبدية د لقرن حضاش، كانو ديجا علاقات قوية ما بين نّڭالزا ؤ نّورمانديين، علا طريق جّواج ما بين لملوك ؤ لأومارا د نّڭليز ؤ لحكام د نورمانديا. نّورمانديين كانو ديجا ف لبلاط لملاكي د نّڭليز من نّص لّول ديال لقرن حضاش.

ف يناير 1066، لماليك إدوارد لمعتارف غادي يموت بلا مايخلي لّي يخلفو. إدوارد كان ديجا واعد ويليام، لّي كان دوك ديال نورمانديا ؤ ولد عمو من دّرجة تّانية، بلي غادي يشد لحكم من موراه. مي ف نّڭليز ماكانوش قابلين بيه، حيت كان ولد ماشي شرعي ؤ دوّز أغلبية د حياتو برّا نّڭليز ف نورمانديا. ويليام ضونك ماكانش عندو طريقة باش يفرض شّرعية ديالو بلا سلاح، ؤ بعد بزاف د لمعارك، قبل راس لعام ديال 1067 غادي يولي ماليك ديال نّڭليز. ويليام غادي يقضي علا جميع نّوبالا من أصل نڭليزي، ؤ ل مدة عقود، غادي يسيطرو نّورمانديين علا جميع لمناصب ؤ لألقاب د سّلطة.