'''محمد بن تومرت السوسي المهدي''' <ref>https://data.bnf.fr/fr/16540414/muh_ammad_ibn_tu_mart/</ref> هوا واحد لمعديل ديّاني مغريبي مسلم من قبايل [[مصامدا|مصمودة]] ؤهوا لواليد الروحي ديال الدولة الموحدية التومرتية ؤ لبناي اللول ديال لموفمو لموحيدي، تزاد [[جبال درن|فالأطلس الصغير]] فجوايه ديك 1080م. لواليد ديالو جا من قبيلة ديال هارغا ؤ لواليدة ديالو جات من لقبيلة ديال مسكالة اللي بجوجهوم فروعا ديال مصمودة. السيد هادا عندو تأتير عضيم و كبير ؤ مالو متيل على لمغريب سيرتو فالدين و السياسة ولاتر ديالو باقي حتال دابا حيت معا التأسيس ديالو لأعضم دولة ݣاع فلغرب لإسلامي وخلا بيها لمغريب يوصل حد التواسع ديالو بلفضل دلمحضار و لعشير ديالو عبد لمومن لݣومي، هوا اللول اللي دخل مفهوم "إمارة المؤمنين" للمغريب و ماعتارفش بلخلافة فلمشرق دلعباسيا و لفاطميا ؤ هوا اللي حط لقاعدة دلحزب الراتيب اللي كايتقرا فالجوامع دلمغريب جماعة ليومينا هادا فلفجر و لمغرب، ؤحتا هوا بنادم اللول اللي تشهد بدكير دلكلمة ديال "مخزن" باش يمعني على السلطة لمركزية اللي حاكمة.<ref>أخبار المهدي بن تومرت وبداية دولة الموحدين - البيذق</ref> ئيقدر ئيتݣال باللي بن تومرت هوا اللي بيّن لملامح اللولة و الرايسية ديال الدولة لمغريبية اللي كانعرفوها دابا.
== حياتو ==
=== بدية ديال حياتو ===
تزاد محمد بن تومرت تقريبا فعام 437ه/1080م فواحد ليبان اللي كانت فيه الدولة لمرابطية ديال صحراوا الصناهجا فلعز دلقوة ديالها واللي كانت شادة من غانا حتال قرطبة، فلقبيلة ديال هرغة، وهيا واحد من بين لقبايل لكبار ديال [[مصمودة]] اللي كانت شادة لوتاد فبلاد سوس، واما السمية ديال تومرت [[تاشلحيت|بتاشلحيت]] راه كاتعني السعد وكاتقول لخبيرة باللي ماحناه (جداتو) فاش ولدات باه نقزات و غوتات بلفرحة وبدات كاتقول "'''''أتومرت إينو!..أتومرت إينو''!'''" زعما "أسعدي! أسعدي!"<ref>الدارجة المغربية مجال توارد بين الأمازيغية و العربية لمحمد شفيق (الصفحة 88)</ref>، وكان باه عبد الله تومرت راجل دياني و معقول ؤ عندو مقام عالي فالدوار ديالو، وهادشي غايدكرو بن خلدون و غايقول عليه "''كان أهل بيته أهل نسك و رباط''" زعما كبر ف فاميلة ناسها دايينها فالدين ديالهوم هادشي علاش ضروري كان غايتأتر بيهوم و غايتحل على لكتوبا و لقراية دلعلوم الدينية و الشرعية، هاد الدري كان قراي واعر حتا فعمر صغير قدر يحفض لقران و لحاديت و يعرف شحال من حاجة فالدين حتا سماو عليه دوارو ب '''"أسافو"''' زعما لمشعل حيت "إيفو" بتاشلحيت هيا "ضوا" / "نوّر". داكشي اللي قرا بن تومرت ولا أسافو فدوارو الصغير فسوس ماقدوش وماشبعش من لعافية دلقراية و التبقشيش اللي شاعلة فيه داكشي علاش مشا للأندالوس فقرطبة اللي كانت لعاصمة ولحاضرة دلعلوم فداك الزمان وقرا عند أساسيد كبار لهيه بحال لقاضي بن حمدين اللي كان واحد الساد مجهد و مشهود ليه بمعرفتو لواسعة. مورا مادوز شي بركة دلوقت تما داز للمشرق و سبق بلإسكندرية فميصرا ؤ كان ولف يحضر للدروس ديال بوبكر الطرطوشي و عاد داز للحجاز تما فين دار لفرض دلحج وزاد كمل طريقو لبلاد الشام ومنبعد لبغداد فلعيراق فاش تلقا لعلوم عند عولامها لكبار... فاش بن تومرت وصل لهاد لبلدان لقا باللي الدولة لمسلمة دلعباسيا بدات كاضعاف و لحملات الصاليبية قدرات تزطم على لقدس ف1099م.
=== لفيراج فين تبدلات حياتو ===
على حساب لكتاب ديال كتاب "الأنيس المطرب بروض القرطاس في أخبار ملوك المغرب و تاريخ مدينة فاس" ، اللي كتبو توارخي لمغريبي بن أبي الزرع عام 1326م ف"باب الخبر عن الدولة الموحدية المومنية و قيامها على يد محمد بن تومرت المسمى بالمهدي" ݣال باللي بن تومرت فالتسافيرة ديالو للمشرق تلاقا بالشيخ الإمام بوحامد لغزالي و تبعو فواحد لوقيتة ديال تلتسنين تما الشيخ رد ليه لبال و بدا كايقشع تامطوريت ديال هاد الطالب لمحضار.تما الغزالي عجباتو الشخصية ديال أسافو ؤ وقتما كان الشيخ كايدوي عليه معا جماعتو كايقول ليهوم:
"لابد لهذا البربري من دولة، أما أنه يثور بالمغرب الأقصى ويظهر أمره و يعلو سلطانه و يتسع ملكه فان ذلك ظاهر عليه في صفائه و بائن عليه في شمائله وردت بذلك الأخبار ودلت عليه العلامات و الآثار"
