تنقية

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

تْنقية لحبوب، ؤلا تْنقية ف لمغريب، هي كلمة معروفة ف لمغريب، كاتعني تنقية ديال ڭاع نواع لحبوب لي غادي يستهلكوها الناس من لحجر و لوسخ و لحشرات الصغيرة لي ممكن يكونو فيها، و تا من لحبوب لخرة لي ماشي من نفس النوع، هادشي كامل بطريقة تقليدية و غير ب ليد.

تنقية لكامون ف لمغريب

طّريقة

كايتدارو لحبوب ف طبسيل مسرح، من لأحسن يكون اللون ديالو بيض ولا فضي باش يبان فيه لوسخ مزيان و يسهال التحياد ديالو. بعدها كايجمعو لحبوب كاملين فجيهة وحدة ديال الطبسيل، و تايبدا لفرز ديالهم بصبعان ديال ليد للجيهة التانية ديال الطبسيل، و تايحيدو أي وسخة مازويناش تايدوزو عليها، هادشي كامل بعد ما تايكونو دوزو لحبوب ف لغربال، و خاصةً زرع.

نواع د لحبوب

ف لمغريب، ڭاع نواع لحبوب كاتنقا قبل ماتستهلك ولا تْطيب، لكن تايبقا الزرع هو أكتر نوع ديال لحبوب مرتابط بهاد لخدمة، خاصة ف لمغريب

لعادات لمرتابطة بتنقية

ف لمغريب، التنقية معروفة أنها خدمة ديال لعيالات، حيت هوما لي كايتكلفو بمسألة تّنقية د لحبوب من لوسخ قبل ماتطيب، لكن فاش كايتعلق لأمر ب زّرع كاتختالف لقضية شوي، حيت لمرا عادةً كاتعرض جاراتها باش يعاونوها ف التنقية، بسبب لكترة ديال الزرع، هادشي كامل قبل ما تغسلو و تنشفو و تطحنو.

رجع تقليد معروف ف لمغريب تعيط لمرا ل جاراتها باش يعاونوها ف التنقية، و كاتوجد ليهم براد ديال أتاي، و تايبقاو خدامين و تايهضرو و كايتبالدو الأخبار، هاد العملية ديال التنقية صعيبة و كاتبغي التركيز والشوف يكون مزيان، و تا اللياقة، وغالبا ماكاتكون ف فصل صيف، ف ضّواية ولا لمرح ديال الدار، ولا ف سطح، ولا على برا قدام الدار، سيرتو ف لعروبيات و لأحياء الشعبية، حيت هاد لبلايص كاتكون فيهم لإضاءة مزيانة، ومناسبة ل هاد لخدمة